Education hnuaia hna thawh mekah dik lo a awm niin kan hria - MZP President

MZP president Lalnunmawia Pautu chuan, School Education department hnuaia hna thawh mekah thil dik lo a awm nia an hriat thu sawiin, MZP-in hma a lak dawn thu a sawi.

MZP, Ngur branch-in nimina Ngur community hall-ah zirlai ti ṭha chawimawina an buatsaiha thu sawitu MZP Gen. Hqrs President chuan, "Education hnuaia NABARD sum hmanga sikul building siamṭhat hna thawha thil fel lo awm nia lang chu MZP Gen.hqrs chuan Thawhṭanni khian kan ngaihtuah dawn a, zirlaite hamṭhatna tur tichhe zawnga thil dik lo titu chu kan chhuah dawn lo," a ti.

Lalnunmawia Pautu chuan, "Education hnuaia hmasawnna hna thawh mekah hian mi dik lo leh pamham, dik lo taka zirlaite sum siam nana hmangtute chu MZP chuan a chê chê sih hlawkah tiin hma kan la ang," a ti a; "Kan MLA-te'n ram leh hnam tan an MLA fund-te hi an hmang dik em tih kan ngaihvena kan hriat a pawimawh," tiin, zirlaite'n politics an ngaihtuah a ṭul thu leh Mizoram budget-te an ngaihven a ṭul thu a sawi.

Inkhawmah hian khuallian Dr ZR Thiamsanga, MLA pawhin thu sawiin, zirnaah zirlaite an ṭan a ngaih thu a sawi a, "Zirnaah ṭan kan lak loh chuan hnam dangin min awp mai ang tih a hlauhawm a, kan ram leh hnam tan zirnaa hmasawn a pawimawh," a ti a; zirlaite chu thawhrimna leh taimakna nen Pathian hre chunga ṭang sauh sauh turin a chah.