Mizoramah Covid-19 vangin mi 475 thi tawh
Nimin khan tlai dar 5 thlengin Covid-19 vang thi mi pahnih an awm a, November 18, Ningani zana thi sorkarin a tarlan thar mi pahnih an awm bawk. Nimin tlai dar 5 thlengin Mizoramah Covid-19 vangin mi 475 an thi tawh a, November thla bikah mi 43 an thi tawh.
November 18, Ningani zan dar 8:10 khan R Vanlalsawia (39), Mission Veng chu State Refferal Hospital-ah a thi a; Covid-19 vei a ni tih October 20 khan hmuh chhuah niin, SRH-ah dah luh nghal a ni.
Ningani zan vek dar 10 khan K Malsawmdawngliana (59), Siaha chu SRH-ah a thi a, Covid-19 positive a ni tih October 31, 2021 khan hri a vei tih finfiah niin, November 3 aṭangin SRH-ah enkawl a nih thu sorkar thuchhuakin a tarlang.
Nimin chawhma dar 10 khan J Laihnet (75), Siaha Meisavaih East chu Siaha District Hospital-ah a thi a, Covid-19 vei a ni tih November 14 khan hmuh chhuah a ni.
Lalmalsawma (65), Thakthing Veng pawh nimin chawhma dar 11:10 khan Covid-19 vangin a thi. Lalmalsawma hi natna dang nei sa a ni a, nimina RAT hmanga endiknaah Covid-19 positive a ni tih finfiah niin, SRH-a enkawl tura hruai a nih laiin kawng lakah a thi a ni.