ASF vangin vawk 29,771 a thi tawh

Vawk pùl hri, African Swine Fever (ASF) avangin nimin thleng khan Mizoramah vawk 29,771 a thi tawh a, November thla chhungin vawk 112 a thi tawh. ASF hi district 11-a khua/veng 271-ah ASF a léng tih finfiah a ni tawh a, nimin bikah ASF vangin vawk pahnih a thi.

Animal Husbandry & Veterinary department-in report an dawn chinah ASF vangin Mizoramah vawk 29,771 a thih tawh laiin, ASF lènna (infected area)-ahte vawk dam lai 47,088 a la awm. Nimin thleng khan ASF infected area-a puan ni lo khua/veng 96-ah chhan hriat loa vawk thi 533 a awm tawh a, infected area-ah vawk 10,190 leh infected area a puan ni loah vawk 190, a vaiin 10,380 suat a ni tawh.

ASF vanga vawk thi zat a tlahniam tawh hle a; kumin October 1-19 chhung khan ASF vanga vawk 286 a thih laiin, November 1-19 ah chuan vawk 112 chauh a thi thung.

ASF vanga vawk suat hi zangnadawmna pek tur chung changah sorkar laipui thu ngaihchan a nih avangin hun eng emaw chen tihtawp a ni tawh a; AH&Vety department-in sorkar laipuia September 17, 2021 thlenga ASF vanga vawk suat neitu chhungkaw 7,351 tana zangnadawmna a dil chu Rs 10,48,43,000 a ni.

Aizawl district chu ASF infected area leh ASF vanga vawk thi tamna ber a ni a, Mizoram puma infected area zinga 41.32% leh vawk thi zawng zawng zinga 41.28% chu Aizawl district-a mi a ni. Serchhip district-a Thenzawl khua chu Mizorama ASF vanga vawk thi tamna ber khua a ni a, nimin thleng khan Thenzawl khuaah ASF vangin vawk 921 a thi tawh a, vawk 615 suat tawh a ni.

AH&Vety department chuan, chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui an ngen a ni.