SRDC-ah faina beihpui thlâk rêl

Sialkal Range Development Council (SRDC) chu an chairman L Thangmawia, MLA hoin SRDC Cell-ah November 18, Ningani khan an ṭhukhawm a, SRDC-ah kum 2022 aṭangin faina beihpui thlak an rêl. SRDC chairman hian SRDC Area Baseline Survey lehkhabu a tlangzarh nghal.

Ṭhutkhawmah hian, SRDC chhunga hmasawnna, zirna leh hriselna tura hmalak meknate an thlirho a, lungawithlak thawkhatah an ngai. Kum 2022 aṭangin SRDC-ah faina beihpui kalpui ṭan ni se, an ti a; mawhphurtu tur leh hmalak dan turte an siam nghal.

SRDC logo thar an pawm a; literature leh cultural lamah hma thar lak te, SRDC area history leh culture chungchanga research project kalpui turin MZU associate professor Dr Zoramdinthara hnenah research project atan Rs 5,00,000 pekte an remti bawk.

SRDC huam chhunga lumpsum grant-in-aid higher secondary school awmchhun Mimbung HSS chu dinhmun ṭha zawka Mizoram sorkarin a dah hma atan kum tin ṭanpuina Rs 2,00,000 pek ṭhin te, sorkar sikul zirtirtu indaih lohnaah SRDC fund aṭanga zirtirtu rawih chhunzawm te, Mimbung PHC leh SRDC-a health sub-centre-te tihchangtlun te, in chhe zualte sakna turin housing scheme (in pakhat tan Rs 1,20,000) kalpuite an remti bawk a ni.

SRDC Baseline Survey-a a lan danin, SRDC huam chhunga khaw parukah chenna in 1,655 awmin, mihring 9,997 an chêng a; in 1,655 zinga 119 chu a chung thilthek leh di a la ni a, lo neia eizawng 70% vel an ni. Khaw tinah ziak leh chhiar thiam lo 5.65% - 13.05% an awm a; chhungkaw 1,655 zinga 75% velin thla khatah Rs 10,000 aia tlem an la lut a ni.