Mizoram pumah BPL 56,584 an awm ; Khaw pangaah BPL chhungkua an awm lo

Mizoram pumah mirethei zual, Below Poverty Line (BPL)-a ziah luh chhungkua 56,584 an awm a, chu chu Mizorama chhung­kaw awm zat aṭangin 19.63% a ni. Hetih lai hian, khaw panga - Pàmchung, Rabung, Tlangmawi, Chawngtlai leh Riangtlei khuaahte BPL chhungkua an awm lo.

Planning & Programme Implementation department hnuaia Economics & Statistics directorate-in BPL Baseline Survey an siam thar chu nimin khan Planning minister Lalsawta'n a pisaah a tlangzarh a; BPL Baseline Survey tharah hian Mizorama BPL awm zatte leh an hmingte kimchang taka tarlan a ni.

Tlangzarhna inkhawmah Planning Minister chuan, BPL Baseline Survey thar chu India ram puma tih dan tur an siam hmanga tih a nih thu a sawi a, "Tihsual nei lo turin theihtawp kan chhuah a, chuti chung chuan tihsual palh a awm thei a, ṭan la leh zual ila. Hei hi document tling a ni a, sorkarin a rin tur a ni. Department dangte pawhin an rin tur a ni a, chutiang tur chuan sorkar aṭangin order chhuah tum a ni," a ti.

Lalsawta chuan, "BPL Baseline Survey report thar hian data rintlak min pek ka beisei a, ṭangkai taka kan hman ngei ka beisei," a ti a; BPL chungchangah media lamah awareness-te tih ni ṭhin mah se, mipuiin an mamawh leh an tana ṭangkai tur en aiin, hmuhnawm an en nasat avangin awareness lama ṭan lak nasat a ngaih thu a sawi.

Nimina tlangzarh tâk, BPL Baseline Survey 2016 report-a a lan danin, Mizorama district pariat zingah Lawngtlai district-ah BPL chhungkua an tam ber a, chhungkua 13,162 an awm. District chhunga chhungkaw awm zat aṭanga teh erawh chuan Mamit district-ah BPL an tam ber a, chhungkua awm zawng zawng zinga 35.64% chu BPL-ah ziah luh an ni.

Hetih lai hian, Champhai district chu BPL chhungkua tlemna ber district niin, chhungkua awm zawng zawng aṭanga 9.35% chu BPL-ah ziah luh an ni a; hei hi Mizoram puma BPL awm zat percentage 19.63% aiin a hniam zawk hle. BPL chhungkaw awm lohna khaw pangate pawh Champhai district-a mi vek an ni.

Survey buatsaihtu Economics & Statistics hian 'One state - One statistics' tih thupui an kalpui tihhlawhtlin an tumnaah kum 2016 aṭang khan BPL Baseline Survey hi an buaipui ṭan a, kum 2017 khan khawih zoin, June 2017-ah Provisional Report an tichhuak tawh a; siamṭhat ngaite an siamṭhat hnuah BPL Baseline Survey 2016 report chu an tichhuak ta a ni. Indian Statistical Strengthening Project (ISSP) hnuaia kalpui niin, a buaipuina senso pawh ISSP aṭanga hmuh a ni.

Survey buaipui turin ISSP hnuaiah State Level Monitoring Committee a awm a, district tinah DC-te kaihhruaiin District Level Monitoring Committee leh khua/veng tinah local council chairman leh village council president kaihhruai Village Level Monitoring Committee a awm bawk.

Tlangzarhnaah hian Economics & Statis­tics director Lalchhuanawma Hrahsel-in BPL Baseline Survey an tih dan a sawifiah a ni.