Serchhip YMA-in kawng an thawm ṭha

YMA sub-headquar­ters, Serchhip chuan nimin khan Serchhip leh Keiṭum inkar, NH-54 kawng­pui nasa taka min hêlna, Sailiam kâwn to Dawngzawl via Lengte Road thawm ṭha turin hna­tlangpui an ko a, mi 300 chuang an thawk chhuak.

June 14, 2018-ah NH-54 kawngpui chu Serchhip dáiah nasa takin a min a, lirthei kaltlang theih a ni lo. NH-54 kawng­pui hêlna turin sorkarin Sailiamkawn - Dawngzawl via Lengte Road kawng chu zawh theih turin ruahmanna a siam a ni. Mahse, lirthei chak chi (four wheel) tan lo chuan kaltlang mumal theih a nih loh avangin, four wheel ni lo motor-te pawh an kal theih nan leh sorkar aṭanga hmalakna mumal a awm tâk loh avangin Serchhip Sub-Hqrs. YMA chuan hnatlangpui a ko ta nia thu dawn a ni.

Nimina hnatlangah hian Serchhip khawpui chhunga YMA branch 21 aṭangin mi 300 chuang an thawk chhuak a, kawng chhe zual laite an thawm ṭha a ni. Kawng thawm ṭhatna atan Serchhip YMA chuan JCB pakhat man chawiin a hmang a, mimal ṭhenkhatin pawisa leh hmanruate an thawh. Kawng an thawm ṭhat hnuah nimin aṭang khan lirtheite an kal tlang thei a, khualzin phur maxicab-te pawh an tlan nghal a ni.

YMA hnatlanga hman turin bialtu MLA Lal Than­hawla, chief minister-in Rs. 5,000 leh tipper pakhat a thawh a; Hrangturzo bialtu MLA Vanlalawmpuii Chawngthu-in Rs. 5,000, Serchhip DC Office-in Rs. 4,000, New Serchhip South V/C-in Rs. 2,000, Serchhip-III V/C-in Rs. 1,000 an thawh bawk.