Tuirini lei chim chhuina report puangzar turin MNF-in Mizoram sorkar an phût

MNF party-a Vigilance hruaitute chuan nimin khan Sesawng leh Khawruhlian inkara Tuirini lui an tlawh a; lei chim hnua lei thar dawh dante a hmunah an enfiah. MNF chuan, Tuiri­ni lei chim chhan chhui­tu Enquiry report chu puang­zar turin sorkar an phût.

MNF-te hi Vigilance Committee co-chairman K Vanlalauva'n a ho a; K Vanlalauva chuan, Cong­ress kaihhruai Mizoram sorkara PWD enkawl chuh tlattute unauin tihsual lian tak an nei nia a lan thu sawiin, "Khawi state-ah mah la thleng ngai lo kum li chhungin lei chim rapthlak tak vawi ruk ngawt mai kan tuar a ni," a ti a, mi pathumin an thih phah chu pawi an tih tak zet thu a sawi.

Mizoram hmar lam tlangdung kawngpui pawimawh berte zinga mi a chhia chu pawi an tih thu leh a tuartu mipui an lainat thu sawiin K Vanlalauva chuan, "He harsatna hi sorkar thil tih dik loh nia kan hriat avangin a mawhphurtu PWD minister Pu Lal Thanzara hi minister ni tlakah kan ngai lo tih entir nan vawiin hian Tuirini lei chimna hmun hi kan tlawh a ni," a ti.

MNF-in RTI Act hmanga information an dawn an tarlan danin, Mizoram sorkarin March 24, 2017-ah Essen Fabricators Pvt.Ltd, Kharagpur, West Bengal chu Tuirini lei ft. 200-a sei siamna tur hmanraw man Rs. 1,80,55,000 a pe a, Excise duty atan Rs. 22,56,875 te, CST atan Rs. 29,45,221 leh Kharagpur aṭanga Tuirinia bungraw phurh thlen man (transportation) atan Rs. 18,00,000 a pe a; a vaia supply order a pek zat chu Rs. 2,50,57,096.88 a ni.

K Vanlalauva chuan, "RTI Act hmanga information kan dawn dan chuan, he lei siam chhung hian lei zawhtu mipuiin harsatna an tawh loh nan kawng dang (subway for diversion) siam ngei ngei tur a ni a, a siamna tur pawh Rs. 19,93,578 lai dah a ni," a ti.

Tuirini lei siamna tur hmanraw thar lei leh lak luhna atan Rs. 2,50,57,096.88 hman a nih laiin, hmanraw hlui hman a ni tih sawiin Vanlalauva chuan, "Hei hi Minister leh supplier-te sam inphiar zawmna, corruption lian tak a nih avangin, MLA/Minister ni tlakah kan ngai lo," a ti a; chutih laia PWD Minister-in March 22, 2018-ah, ‘A chim chhan sawi theih a ni lo’ tia a sawi chu mak an tih thu a sawi.

K Vanlalauva chuan, Tuirini lei chim chhuitu Enguiry Commission-in May 23, 2018-a report a thehluh tawh chu tun thlengin sorkarin a la puangzar duh lo tih sawiin "Zêp rûk emaw, thup ngai emaw a tam vang niin kan hria," a ti a; enquiry report chu mipui hriatah puangzar vat turin a phût a ni.

MNF Vigilance Co-Chairman chuan, Enquiry report pharh si loin PWD Minister-in June 1, 2018 khan 'Tuirini lei chimah engineer-te'n mawhphurhna an nei lo’ tiin a sawi tih sawiin, "Enquiry report pharh si loa a mawhphurlotu a hre tlat hian ngaih a tiṭha lo a, enquiry report hi ama duha a ziahtir a ni em, tih kan zawt a ni," a ti.

K Vanlalauva chuan, "Tuirini lei dawh tura ṭul zawng zawng buaipuitute hi engineer an ni a, a dawh hna thawktu pawh engineer an ni a, an dawh dan dik leh dik loh endiktu pawh engineer an ni. Engineer chunga thuneitu awm­chhun chu Minister chauh hi a nih avangin, lei chim chhan hre ber tur pawh a ni a, Minister berin, 'Engineer-te'n mawhphurhna an nei lo’ a tih hi 'Buichhia laih lohin a inpuangah’ kan ngai," a ti a; minister nihna tihbawrhbángah puhin, minister office luah zel tlaka an ngaih loh thu a sawi a ni.