Chief Minister-in Entrepreneurship Summit a hawng

Mizorama awmze nei zawk leh zau zawka sumdawnna kalpui a nih theihna tura buatsaih, Mizoram Kailawn hnuaia hmalaknaah nimin khan Pachhung University College Multipurpose Hall-ah Entrepreneurship Summit buatsaih a ni a, chief minister Lal Than­hawla'n a hawng.

Chief Minister chuan, sorkarin ṭhalaite tana khawvel siam a tum thu sawiin, "Education leh sport lamah pawh sorkarin nasa takin ṭan a la a ni. Sorkar hnain min daih vek lo a, ṭha­laite'n eizawnna an neih theih nan Mizoram Kai­lawn hi ruahman a ni. He programme hi NEDP hnuaia awm a ni a, NEDP hi kan sorkar policy niin, NEC pawhin ṭha a ti a, hmarchhak state zawng zawnngah entawn turin a hrilh," a ti.

Planning minister Lal­sawta pawhin thu sawiin, NEDP hnuaia entre­pre­neurship tihmasawn tura hmalakna pakhat Mi­zoram Kailawn chu Mizoram economy-in hma a sawn theihna kawng pakhat leh ṭhalaite'n eizawnna kawng ṭha leh hlâwk zawk an neih theihna tura kawng inkawhhmuhna a nih thu a sawi.

Planning secretary Dr C Vanlalramsanga chuan, Mizoram sorkarin NEDP hnuaiah entrepreneurship a kalpui tih a sawi a, "Entrepreuneurship lama ṭan lak hi ram hmasawnna atana thil pawimawh leh tihmâkmawhah sorkar chuan a ngai a, Mizoram economy-ah nghawng ṭha a nei ngei ang," a ti.

Entrepreneurship Sum­mit hi ṭhuang hniha kalpui a ni a, chawhma lamah mithiam hrang hrangte'n entrepreneur-te thil pawi­mawh hrang hrang an zirtir a, chawhnuah B-Plan Contest-a a ti ṭha pangate hnenah lawmman hlan a ni. Lawmman hi pakhatna Rs. 4,00,000, pahnihna Rs. 3,00,000, pathumna Rs. 2,00,000, palina leh pangana Rs. 15,000 a ni.