Mau hmang ṭangkai turin Hmalak mek a ni - CM
New Delhi-a chám mek chief minister Zoramthanga chuan, nimin khan Development of North Eastern Region (DoNER) leh Cooperation enkawltu union minister of state BL Verma chu a pisaah a kâwm a; mau hmang ṭangkai turin hmalak mek a nih thu a hrilh.
CM Zoramthanga chuan, DoNER leh North Eastern Council kaltlanga India hmarchhak state-te tana sorkar laipuiin sum a pek dan chu ennawn ngai a awma a hriat thu sawiin, "Tun dinhmunah chuan hmarchhak state-te hian hmasawnna ruhrel pawimawh tak tak an mamawh leh siam theih turte chu an hmuh tur sum an hmuh loh avangin bul kan ṭan theih loh phah a ni," a ti.
Mizoram bikah chuan state economy chawi sáng thei khawpa resource ṭha a awm nia sawiin, "Mau hmang ṭangkai tura hmalak a nih mek laiin, link road mamawhna sang tak a awm," a ti a, link road atan sorkar laipuiin sum a ruahman a ṭul thu a sawi a ni.