Mizoramin Fastest Mover State a dawng

India ram khawpui fai endikna, Swachh Sur­vekshan 2021-ah Mizo­ramin Fastest Mover State Award a dawng a, Lunglei leh Biate khuain Best City in Citizens' Feedback Award an dawng bawk.

Ministry of Housing and Urban Affairs hnuaia Swachh Bharat Mission (Urban)-in kum tina a buatsaih ṭhin Swachh Survekshan 2021 lawmman semna Swachh Amrit Mahotsav chu November 20, Inrinni khan Vigyan Bhavan, New Delhi-ah neih a ni a, President Ram Nath Kovind-a'n lawmmante a sem. Mizoram aṭangin UDPA director H Lianzela, Swachh Bharat Mission (Urban) state mission director ni bawk hoin UDPA aiawhte leh Lunglei leh Biate khawtlang hruaitute an tel a ni.

India ram khawpui zinga municipal body 100 hnuai lam (less than 100 urban local bodies) category-ah Mizoram chu Fastest Mover State atan thlan a ni a, municipal body 100 chung lam category-ah Karnataka chu Fastest Mover State a ni thung.

Mihring 50,000-1,00,000 inkar chenna khawpui zingah Lunglei chuan Best City in Citizens' Feedback in the North East Zone a dawng a; Biate chuan mihring 25,000 aia tlem chênna zingah Best City in Citizens' Feedback in the North East Zone award a dawng bawk.

Municipal body 100 chung lam zingah Chhattisgarh chuan state fai ber Cleanest State lawmman a dawng a, kum thum chhung a záwna a dawnna a ni. Municipal body 100 hnuai lamah Jharkhand chuan a vawi hnih nan Cleanest State lawmman a dawng.

India rama khawpui fai, Cleanest City Award chu mihring 1,00,000 aia tam chenna khawpui zingah Madhya Pradesh-a Indore khaw­puiin a záwna a ṭum ngana atan a dawng a; mi 1,00,000 aia tlem chenna khawpui zingah Maharashtra-a Vita khawpuiin a dawng thung.

India ramah kum 2014 aṭanga Swachh Bharat Mission kalpui a nih hnuah kum 2016 aṭangin Swachh Survekshan hi buatsaih ṭan a ni.