Education Minister-in Mizoram mamawh thlen

November 22, Inrin­ni khan Gauhati Medical College & Hos­pi­tal auditorium-ah hmarchhaka Edu­ca­tion minister-te in­tawh­khawmna, North East Education Conclave neih a ni a, Union Education minister Dharmendra Pradhan-a'n a hmanpui. School Education mi-nister Lalchhandama Ralte pawh a tel a, Mi­zoram dinhmun leh mamawhte a sawi.

Lalchhandama Ralte chuan, zirna lama Mizo­ramin hma a lak dan, hma a sawn dan leh mamawhte sawiin, "Sorkar laipuiin New Education Policy (NEP) 2020 a siam hi a lawmawm hle.

NEP 2020 kalpui tura hmalak dan tur chi hrang hrang - hun awh rei leh rei lo chi ruahmanna siam a nih bakah zirna lama mithiam ṭhiau telna committee hrang hrang din a ni a, heng rua­hmanna hmang hian Mizo­ramah zirna ṭha zawk neih thuai beisei a ni," a ti.

Education Minister chuan, Right to Education (RTE) Act, 2009 Section 7(3)-in a tarlan anga sorkar laipuiin state sorkar-te sum mamawh a pek dan turah indàwr tawnna hun a bichilh tih sawiin, "Samagra Shiksha hnuaia zirtirtu leh teacher educator-te hlawh tur sorkar laipuiin a ruahman chu 50% dâwnin a tlahniam a ni," a ti a, chu chuan state sorkar tan harsatna naménlo a thlen thu leh sorkar hmalakna thar tam tak kalpui mumal theih a nih loh thu a sawi.

Minister chuan, sorkar laipui hmalakna péng - Nipun Bharat, Ek Bharat Shreshtha Bharat, Fit India, Swachh Bharat Swachh Vidyalaya, Covid-19 Campaign leh Constitution Day kalpui chu lawmawm a tih thu a sawi a, "Samagra Shiksha hnuaiah hmun kilkhawr zawka chengte'n zirna an ban phâkna tura Netaji Subhash Chandra Bose Avasiya Vidyalaya kalpui hi thil lawmawm tak a ni," a ti.

Samagra Shiksha kalphung tharah state sorkarte rawtnain ngaih pawimawh a hlawh tâwk loh avangin zirlaibu leh school uniform a thlàwna pek kawngah harsatna a awm thu te, zirlai chàwl tawh secondary school lama kaitir tura sum ruahman chu a tlem avangin hmalak a harsat thute leh thil dang pawimawhte a sawi bawk.

Lalchhandama Ralte hi School Education secretary Dr Lalzirmawia Chhangte leh Samagra Shiksha state project director Lalhmachhuana ten an ṭawiawm a ni.