KHAWTHLIR

Thisen pe
November 20, Inrinni khan KṬP, Chawlhhmun Branch-in Aizawl Civil Hospital tan an kohhran hall-ah unit 53 an pe a, petute mipa 43 leh hmeichhia 10 an ni a; KṬP, Thakthing Veng Branch-in an kohhran hall-ah ZMC tan unit 26 an pe, mipa 18 leh hmeichhia pariat an ni. KTP, Champhai Bethel Branch pawhin Champhai District Hospital tan unit 18 an pe bawk. Inrinni vek khan Siaha Higher Secondary School NSS-in District Hospital-ah thisen unit 32 pein, petute mipa 26 leh hmeichhia paruk an ni a; Mizoram Gorkha Youth Association, Kolasib pawhin Kolasib District Hospital-ah unit 29 an pe a, petute mipa 28 leh hmeichhia pakhat an ni.

Micro containment
Aizawl bawrhsap Dr Lalhriatzuali Ralte chuan November 20, Inrinni khan Mount Carmel School, Chaltlang huam chhung chu Covid-19 micro containment area-ah a puang. Mount Carmel School-ah hian November 20, Inrinni khan Covid-19 positive mi 41, mipa 15 leh hmeichhia 26 hmuh a ni a, symptom nei vek an ni. Micro containment area-ah hian a ṭul angin Covid-19 vei zawn chhuah leh chhui zui hna thawh a ni ang.

AIPTF Secretary
All India Primary Teachers’ Federation (AIPTF) General Council Meeting & Election, November 14-15, 2021 chhunga Bodhgaya, Bihar-a neihah AIPTF secretary atan F Lalramliani, finance secretary, Mizoram Primary Teachers’ Association chu thlan a ni. F Lalramliani hian a hmain AIPTF office bearer term hnih a lo chelh tawh a ni.

Tawngtai rual
Mizoram Kohhran Hruaitute Committee rorel angin, Mizorama kohhran hrang hrangte chu November 20, Inrinni zan khan kohhran inkhawmah ram tan an ṭawngṭai rual. Ṭawngṭai thupui duan sate chu - 'Pathian hnena lawmthu sawina' leh 'Covid-19 hripui léng a lo reh thuai theih nan leh hripui vanga thi an awm zel tawh loh nan' tihte a ni.

Minister-in enfiah
Minister of state Dr K Beichhua chuan tun hnai khan a department chana a bial leh khawchhak tlangdunga hmalaknate a enfiah. Minister hi Social Welfare secretary Sangchhin Chinzah, AH&Vety director Dr H Laltlanmawia, Sericulture director Lalrozama, Women & Child Development director Lallianpuii leh Excise & Narcotics commissioner Ngurchungnunga Sailo ten an ṭawiawm a ni.

Bike chesualah thi
B Lalmuanpuia (27) s/o B Lalnghilhlova, Lunglei Zotlang chu nimin chhun dar 12:50 khan bike-in a chesual a, Christian Hospital panpui a nih hnuah a hliam tuar loin a thi. Thu dawn danin, B Lalmuanpuia hi Zotlang lam aṭanga Pûkpui lam pana tlân a ni a, Zotlanga BSF camp chhungah truck ding lai a sú a ni.

Tanpuina hlan
AMC councillor C Lalchhandami chuan November 19, 2021 khan Covid-19 dona hmanruate Maubuang Branch YMA hnenah a hlân. A thawh 18-na atana hmanrua a pekte chu - oxygen concentrator, infrared thermometer, oxygen mask leh N-95 mask leh surgical mask eng emaw zat a ni.