Ni hnih chhungin hripui vei Mi 773 hmuh chhuah a ni

Mizoramah Covid-19 vei November 19, Zirtawpni khan mi 336 leh November 20, Inrinni khan mi 437 hmuh belh a ni a, ni hnih chhungin mi 773 hmuh chhuah a ni. Inrinni leh nimin khan hripui vei dam tawh mi 557 chhuahtir an ni a, Covid-19 vangin mi pahnih an thi.

Covid-19 vei November 19-a hmuh chhuahte chu ZMC laboratory-a hmuh pakua, TrueNAT hmanga hmuh 27, RAT hmanga hmuh 296 leh FIA hmanga hmuh pali an ni a, mipa 164 leh hmeichhia 172 an ni. Inrinnia hmuh tharte chu ZMC-a hmuh 46, TrueNAT hmanga hmuh 44, RAT hmanga hmuh 342 leh FIA hmanga hmuh panga an ni a, mipa 194 leh hmeichhia 243 an ni.

IDSP record angin, Mizoramah Covid-19 vei 1,31,685 hmuh chhuah a ni tawh a, mipa 63,747 leh hmeichhia 67,938 an ni. Nimin tlai dar 5 thleng khan mi 1,26,308 (95.92%) chhuahtir an ni tawh a, mi 477 (0.36%) thi tawhin, enkawl mek mi 4,900 (3.72%) an awm.

November 19, Zir­tawp­nia Covid-19 vei hmuh chhuah mi 336 zingah symptom nei mi 235 an awm a, mi 92 chu symptom nei lo niin, dinhmun tarlan loh mi pakua an awm. Hripui vei November 20-a hmuh thar mi 437 zingah symptom nei mi 288 an awm a, mi 149 chu symptom nei lo an ni. Ni hnih chhung hian Siaha district-ah sample endik a awm lo.

November 20, Inrinnia Covid-19 positive hmuh chhuah zingah zirna-in leh inkhung khawmnaa hmuh an awm nual a; Mt. Carmel School, Chaltlangah zirlai leh thawktu mi 41, JCRE Skill Solutions, Luangmual Vengthlangah mi 24, Lunglei District Jail-ah mi 32, Bethesda Hostel, Lungleiah zirlai pakua leh Adventist School, Lungleiah zirlai pariat hmuh a ni.

November 2021 ni 20 chhungin Mizoramah Covid-19 vei mi 10,161 hmuh chhuah a ni tawh a, chawhrualin ni tin mi mi 508.05 hmuh chhuah an awm ang a ni. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung.

November 20, 2021 thlenga swab sample endik tawh 13,98,407 aṭanga RT-PCR hmanga endik zat percentage chu 22.99 a ni a, RAT hmanga endik zat chu 71.10% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,31,685 chu mi 1,000 zelah hripui vei mi 120 an awm ang a ni a; mi 1,00,000 zela Covid-19 vangin mi 43 an thi tawh ang a ni.

Nimin khan tlai dar 5 thlengin hripui vei dam tawh mi 145 chhuahtir an ni a; Aizawl district-ah mi 119, Kolasib district-ah 12, Mamit district-ah pakua leh Hnahthial district-ah mi panga an chhuak. Inrinni khan mi 412 chhuahtir an ni bawk.