Covid vaccine dose 12,57,336 pe tawh

January 16, 2021 aṭanga November 20, Inrinni thleng khan Mizoramah Covid-19 laka invenna damdawi (vaccine) dose 12,57,336 pek a ni tawh.

Integrated Disease Surveillance Programme (IDSP) tarlan danin, November 20, Inrinni khan Mizoramah Covid-19 vaccine dose 53 pek chhuah a ni a, mi 18 hnenah dose khatna leh mi 35 hnenah dose hnihna pek a ni.

Kumin January 16 aṭanga November 20 thleng khan Mizoram sorkarin hmun a ruahman aṭangin vaccine dose 12,53,115 pek a ni tawh a, dose khatna 7,08,232 leh full dose 5,44,883 a ni. Private facility-te'n dose khatna 2,177 leh full dose 2,044, a vaiin dose 4,221 pek a ni tawh bawk.

Private facility aṭangin Inrinni thleng khan vaccine dose 4,221 pek a ni tawh a; Aizawl East-ah dose 2,481, Aizawl West-ah 1,694 leh Serchhip district-ah dose 46-te pek a ni tawh.

Health department-in district a ṭhen danin, sorkar hmun ruahmanna aṭanga vaccine (first & full dose) pek zatah Aizawl East district chu pe chhuak tam ber a ni a, dose 3,36,596 an pe tawh a, Mizorama vaccine pek tawh dose 12,57,336 aṭangin 26.77% a ni. Siaha district chu vaccine pek tlemna ber a ni a, dose 58,025 chauh pek a la ni.

District hrang hranga vaccine (first & full dose) pek dan chu - Aizawl West-ah dose 2,20,979, Lunglei district-ah 1,72,667, Champhai district-ah 1,30,970, Kolasib district-ah 86,593, Serchhip district-ah 78,111, Lawngtlai district-ah 95,031 leh Mamit district-ah 73,941-te a ni.

Covid-19 vaccine la tawh hlâwm ṭhen hrang hrang zingah dose khatna la zat aṭanga chhûta full dose la tam ber chu kum 60 chung lam an ni a, 97.93%-in vaccine an la kim tawh. May 17, 2021-a vaccine pek ṭan kum 18-44 inkarte chu vaccine dose khatna la zat aṭanga chhûtin full dose la tlem ber an ni a, 68.88% chauhin an la la kim a ni.