All India Cooperative Week khâr

All India Cooperative Week vawi 68-na chu November 20, Inrinni khan Dawrpui Multipurpose Hall-ah khâr a ni a, Cooperation minister C Lalrinsanga'n a hmanpui.

C Lalrinsanga chuan, cooperative movement innghahna leh thil tum a ril hle tih sawiin, "State mai ni lo, ram economy ṭhan zelna tur a hril. Chuvangin, tuna kan kal dan aia ṭha leh chak zawkin, kan hmalakna aṭangin engtinnge ram ei leh bar dinhmun kan siamṭhat thei tih ngaihtuahna put a pawimawh," a ti.

Cooperative movement chu act leh rules neia kal a nih thu sawiin C Lalrinsanga chuan, movement kalpuitu society-te chu dan tlawhchhan an neih hre renga danin kal dan tur a kawh­hmuh anga kal turin a chah.

Cooperation Minister chuan, cooperation movement thil tum te, a innghahna lungphûmte chu a ṭhat em avangin society-te tan chauh ni lo, sorkar, khawtlang leh kohhran huang chhung thlengin a seng luh theih thu a sawi a, "Mipuiin hma kan sawn a, lei rem kan rah a, dinhmun ṭha zawk kan chan theihna atan movement hi din a ni," a ti.

All India Cooperative Week khar inkhawmah hian Mizoram State Cooperative Union hruaitu ni ṭhin, Lalbiakthanga Pachuau, tun hnaia Padma Shri dawngtu hnenah lawmpuina an hlân a ni.