Vawiinah ngei scho' pek an phût

Mizo Students’ Union (MSU) Gen. Hqrs chuan, post matric tribal scholarship chu November 22, vawiin ral hma ngeia zirlaite hnena pe turin Mizoram sorkar an phût a; hun tiam chhunga pek a nih loh chuan na zawka hmalak an tum.

Sorkar laipuia Ministry of Tribal Affairs aṭangin kum 2020-21 atana post matric tribal scholarship second instalment sum November 2, 2021-ah Mizoram sorkar a thleng tawh tih tarlangin MSU chuan, "Tun thlenga zirlaite bank account-a thun a la ni lo leh Finance department-a hun rei tak file tihkhawmuan a ni hi hriatthiam har kan ti a, Mizoram sorkar hian zirlaite a ngaihsak tâwk loah kan ngai," an ti.

MSU chuan, "Zirlaite'n nghaklel taka an thlir leh an mamawh em em scholarship hi kan sorkar hian November 22, 2021 (Thawhṭanni) ral hma ngeia zirlaite bank account-a sem chhuak turin kan phût," an ti a; vawiin ral hma ngeia zirlaite'n an dawng lo a nih chuan zirlaite'n an chanvo an hmuh theihna turin an che chhuak dawn tih sawiin, zirlaite pawh lo inring turin an chah a ni.

MSU chuan, kum 2020-21 atana zirlaite dawn tur scholarship first instalment pawh Mizoram sorkarin hun rei tak zirlaite hnena sem mai loin a tikhawmuang a, MSU-in hma an lak hnuah chauh zirlaite hnenah sem a ni tih an tarlang a, "Second instalment chu Ministry of Tribal Affiars aṭangin hun rei tak state sorkara thun a nih loh avangin zirlaite'n lo nghak hram hram turin kan inchah. Chutih rualin, zirlaite chanvo state sorkar kut aṭanga hun rei tak tihkhawmuan a la ni ta zel hi lungchhiatthlak kan ti tak zet a ni," an ti.