Zirna tibahlah khawpa kohhran leh khawtlanga inhmang lo turin chah
Minister Vanlalawmpuii Chawngthu chuan, zirlaite chu zirna tibahlah phah khawpa khawtlang leh kohhrana inhmang rih lo turin a chah.
Biate MZP-in an huam chhunga HSLC leh HSSLC pass ṭhate chawimawina hun June 19-a Zialung Community Hall-ah an buatsaih a hmanpuinaah thu sawiin bialtu MLA Vanlalawmpuii Chawngthu chuan, hlawhtling turin malsawmna dawng tlaka taimak a ngaih thu sawiin, "Mi thiam leh fing apiangte'n an thiam loh tamzia an hria a, an inzir belh zel ang hian, zirlaite chuan thiam thil zir kawnga tawp chin an neih loh a pawimawh. Ram leh hnam chawisanna leh humhimna turin zir thiamna lamah ṭan lak thar a ni," a ti.
Hnam fing leh changkang apiangin nu leh pate an zah a, an chawimawi ṭhin tih sawiin Vanlalawmpuii chuan, "Zirlaite pawhin nun dan hmang leh zirna huanga hlawhtlinna hmanga nu leh pate chawimawi ve thei tura ṭan an lak a pawimawh," a ti a; ram leh hnam humhimna turin hnam nun ze mawi chawi nun zel leh Mizo ṭawng hman fimkhur a ṭul thu a sawi.
Zirlai chawimawina hun hi Biate MZP president C Lalrindika'n a kaihruai a; HSLC-a distinction-a pass mi pathum, first division-a pass mi paruk leh HSSLC-a distinction-a pass mi pakhat leh first division-a pass mi paruk hnenah chawimawina hlan a ni.