Damlo tana morphine hman chungchang zirho

Synod Hospital chuan nimin khan CMO conference hall-ah damlo natna khirh vei, na tak tuarte tana morphine (damdawi) hman chungchang zirna, Opioid Availability Workhsop an buatsaih a, Health minister Lal Thanzara'n a hmanpui.

Lal Thanzara chuan, damlo natna khirh tak vei, tihdam hleih theih loha ngaih hial tawh, pallialitive care mamawhte enkawl a pawimawh thu sawiin, "An nun tihnawmna tur leh na ngawih ngawih an tawrh loh nan morphine hmanga enkawl thuah medical mite leh mipui tan pawh hemi chungchang hriat zau a ṭul. Mithiamte chhût danin, khawvelah pallialitive care mamawh zinga 1% chauhin an mamawh ang damdawia enkawl an ni a, heng mite'n enkawlna ṭha zawk an dawn theih nan ṭan lak a ṭul a ni," a ti.

India rama pallialitive care lama sûlsutu Kerala aṭanga lo kal Dr MR Rajagopal pawhin thu sawiin, "Nachhawkna damdawi pangngaiin a chhâwk zawh tawh loh, damlo na tak tuarte enkawl nan morphine hmang turin doctor leh nurse-te'n thiamna bik an neih a ngai," a ti a; Narcotic Drugs and Psychotropic Substances (Amendment ) Act, 2014 ṭha taka kalpui leh damdawi hman sual chíngte ban phâk loha a mamawhtute'n dik taka hman dan ngaihtuah a paiwmawh thu a sawi.

Population Based Cancer Registry India-in a tarlan danin, Mizoramah kum 2012-2014 chhungin cancer vei thar mi 4,656 an awm a, ni tin cancer vei thar mi paruk zel awm ang a ni a; cancer vanga thi Mizoramah ni tin mi pathum zel an awm ang a ni bawk.