Bru mi pathumin Mizo sikul naupang an bei

Borai High School, Zawl­­nuama pawl 10 zirlai Lalhriatpuia, Vanlalthlanga, Zawlpui tupa chu June 19, Thawhlehni tlai dar 3 vel khan a sikul báng haw lam Bru pathumin kut an thlak a, chema sah an tum niin MZP headquarters, Zawlnuam chuan an tarlang.

Zawlnuam MZP tarlan danin, thil thleng chungchang hre chiang turin nimin khan Zawlnuam MZP hruaitute leh Langkaih Group YMA hruaitute chu Zawlpui khuaah an kal a, Zawlpui V/C leh YMA hruaitu te, Hamsapara (Tripura relief camp)-a Young Bru Association (YBA) leh khaw­tlang hruaitute nen an inbia a ni.

Sikul naupang pi, Lalrem­thangi sawi danin, a tupa chu Zawlpui aṭangin km. 7 vela hlá, Borai H/S, Zawlnuamah lehlángin kein sikul a kal ṭhin a, June 19 khan a sikul báng, an khaw pana a haw chu Zawlpui thlen hma deuhah Bru tleirawl pakhatin tibuaiin, chema sah a tum a, Mizo naupang hian lo bei letin, chem a phih thlaksak a ni.

Bru tleirawlin Mizo nau­pang a hneh loh avangin Bru tlairawl chhan turin kawng siar hnim kar aṭangin Bru puitling pahnih an chhuak a, Mizo naupang chu kut an thlak a ni. An iptê aṭanga chem phawrh an tum laiin Mizo naupang chu a tlanchhia a, Bru-te chuan km. khat vel an ûm zui a ni.

Bru mi pathumte hi Tripura-a relief camp pakhat, Hamsapara-a khawsa an ni a, an thil tih dan avangin Hamsapara-a YBA hruaitute leh khawtlang hruaitute chu ngaihdam dil turin Zawlpuiah an kal a; Bru mi pathumte chu an tlanbo thu leh man ngei an tum thu an sawi.

Zawlpui V/C kaihhruaia joint meeting chuan, Lal­hriatpuia kut thlaktu Bru mi pathumte leh an chhungte chu June 23, Inrinni chawhma dar 11 ral hma ngeia Vanlalthlanga te chhungkaw hnenah ngaihdam dil tur leh zangnadawmna pe turin an phut a; 'Hemi hun chhunga ngaihdam an dil lo a nih chuan, Mizoram leh Tripura inkalpawhna zawng zawng danchah vek ni se. He thil hi bawhzui zel ni se,' an ti.

Langkaih Group YMA president J Malsawma chuan, Bru-te chu misual hum lo tur leh an phu tâwk hremna an hmuh ngei theih nan man chhuak ngei turin a phût a; tun hnuah thil a thleng leh a nih chuan, hnam inkarah thil ṭha lo a thleng a nih pawhin, Bru-te cho chhuah a nih tur thu a sawi bawk.