CM a ngawih reng vangin mak an ti

Serchhip ZPM Steering Committee leh Serchhip Block East MNF-te chuan thuchhuah inṭâwm siamin, tun hnaia ruahsurah Serchhipah leimin vanga harsatna tawk tam tak an awm laia bialtu MLA Lal Thanhawla, chief minister a ngawi reng chu mak an tih thu an tarlang.

Serchhipa ZPM leh MNF-te chuan, tun hnaia ruahsur nasa vanga leimin leh tuilian chu mi eng emaw zatin an tuar tih sawiin, "In chim te, in luah ngam loh ṭhiah te, leimin hlauh vanga mahni in lum luah ngam loa thlabar taka awmte an awm a, hetih lai kara Serchhip bialtu Pu Lal Thanhawla a ngawi reng hi mak kan ti tak meuh a ni,” an ti.

Pawl pahnihte chuan, Serchhip khawpui chhunga inkalpawhna kawng hmun tam takah a min thu te, chhim lam nena kan inkalpawhna leh khawchhak tlangdungte'n an hman ber NH-54 kawngpui chu Sailiamkawn bulah a min avangin chawlhkar khat a pin tawh thu te, Serchhip-Thenzawl kawnga Mat lei chu a dona tuilianin a pheh avangin motor zawh mumal ngam loha a awm mek thute an tarlang a ni.

Sorkar a chêt muan avangin nimin khan Serchhip Sub-Hqrs. YMA-in NH-54 kawng hêlna tur kawng thawm ṭhaa an hnatlan hial thu sawiin, "Hetianga khawtlangin an puih luai luai ngai sorkar chak lo kan nei hi vanduaithlak kan ti tak zet a, a bialtu, chief minister ni bawk Pu Lal Thanhawla hian zah nachang tal hre ve se kan ti hle a ni," an ti.