MPYCC-in thisen lak chhuahna dan thar damlo leh mipui tihbuaina turah an ngai

Mizoram Pradesh Youth Congress Committee (MPYCC) hruaitute chuan nimin khan Aizawl Press Club-ah thuthar thehdarhtute an kâwm a; sorkar blood bank aṭanga thisen lak chhuah dan ruahmanna thar chu damlo leh mipui tihbuaina tur a nih thu an puang.

Congress ṭhalai president Dr Lalmalsawma Nghaka chuan, blood bank aṭanga thisen lak chhuahna dan thar chu sawiselin, "Thisen hi damlo, a mamawhte tan liau liaua mi tlawmngaite'n an pek a ni a, a mamawhtute hnena pek chhuah dan hi eng vanga tibuarchuar kual vak nge a nih? Nunna chhanna atana thisen pek khawm sa hian damlo thliar hran bik leh hospital thliar hran bik a nei em  ni?" a ti a; Health Care Scheme zawm ve lo private leh kohhran damdawi-inte hrem tumna a ni theia an ngaih thu a sawi.

Dr Lalmalsawma chuan, Hospital & Medical Education Director office chu darkar 24 chhung hawn a ni dawn  nge, chhun lamah office hun chhung chauhin thisen an pe chhuak dawn tih chu an zawhna a nih thu a sawi a, " Phalna lak kual vanga khawtlaia nunna chán an awm palhin sorkarin mawh a phur ngam em? Zangnadawmna a pe thei dawn em ni?" a ti.

MPYCC President chuan, thisen lak chhuahna dan thar avangin damdawi-in pakhata damlote'n tun hnaiah Aizawl Civil Hospital blood bank aṭangin thisen lak an tumna a hlawhchham thu a sawi a; sorkar leh private/kohhran hospital-te inkar chingfel vat turin Mizoram sorkar an phût tih a sawi.

Health minister Dr R Lalthangliana chu a hna chanpual a tlin lo a nih chuan báng ngam se an duh thu Dr Lalmalsawma chuan sawiin, "Chief minister Zoramthanga hian lirtheia vâkvelte nunphung tikhaihlaka No Parking area-ah motor dah­in, office hour pèl ṭhak ṭhakin badminton khel tawh lo se, thil chinfel ngai chingfelin, ram leh hnam tan a ngaihtuahna séng zawk rawh se," a ti.