Minister pahnihin tuilian sûlhnû an enfiah ; Tuilian tuarte ṭanpuina pek tur an puang

Tun hnaia Khawtlangtuipui lianin Tlabung leh a chhehvela chhiatna a thlente chu June 20, Nilaini khan Home minister R Lalzirliana leh Disaster Management & Rehabilitation minister C Ngunlianchunga ten a hmunah an enfiah. R Lalzirliana chuan, tuilian tuartute chu ṭanpuina awm thei apiang ngaihtuahsak an ni dawn thu a sawi.

Minister pahnihte hi Lalrinliana Sailo, MLA-in a ṭawiawm a, Aizawl aṭangin helicopter-a kalin, chawhma lamah Tlabung an thleng a; bialtu MLA Nihar Kanti Chakma leh SDO (Civil) Lalmuanpuii ten lo dawngsawngin, khaw­tlang hruaitute nen chhiatna thlen dan an sawiho a ni.

Tlabung SDO(C) hian Tlabung leh a chhehvelin tuilian vanga harsatna an tawh dante a sawifiah a; khuarêl chhiatna thlen dan chipchiar zawka zir chiang turin Tlabung Sub-Division huam chhung chu zone pathumah ṭhen a nih thu a sawi.

Home minister R Lalzirliana chuan, Tlabung leh a chhehvel mipuiin tuilian vanga chhiatna an tawh chu sorkarin a hriatpui tih a sawi a, "DMR Minister kaihhruaina hnuaiah ṭanpuina awm thei apiang ngaihtuahpui an ni dawn a ni," a ti.

R Lalzirliana chuan, tuilian vanga hmun him lama insasengte zinga mahni chenna ina la kîr leh lote chhawmdawlna hmahruai atan sorkarin buhfai quintal 50 a pek nghal thu a puang a, Khawthlangtuipui lianin a tihbuai chhungkaw hrang hrangte tan sorkarin a tih turte chak taka a bawhzui dawn thu a sawi. Ṭanpuina chu a dawng tur dik tak an dawn theih nan, a buaipuitu official-te leh khawtlang hruaitute'n rinawm taka an mawhphurhna an hlen a ṭûl thu a sawi bawk.

DMR minister C Ngunlianchunga chuan, tuilian vanga harsatna tâwkte ṭanpui kawnga khawtlang mipuite ṭanrualna fakawm a tih thu sawiin, "Chhiatna thlen dan report dik tak pe ula, ṭanpuina tur pawisa a awm a ni," a ti a; nikuma tuilian vanga Tlabung leh a chhehvel khaw mipuite harsatna tawh a hmuna a enfiah theih loh avanga pawi a tih thu a sawi.

C Ngunlianchunga chuan, kum kal ta khan Mizoram hmun hrang hranga khuarel chhiatna tuarte chhawmdawl nan Mizoram sorkarin sorkar laipuiah cheng vbc. 116 chuang a dil thu leh, cheng vbc. 35 vel sorkar laipuiin a pek tawh thu a sawi bawk.

Bialtu MLA Nihar Kanti Chakma chuan, tun hnaiah kum záwna Khawthlangtuipui a lian vak chhan sawiin, "Hei hi ruahtui tam vang ni ringawt loin, chhan dang a awm. Ram pahnih inrina hung hna thawh mek leh Bangladesh-a Kaptai tuikhuahte hi rei lo te chhunga Khawthlangtuipui chîm chin san thut ṭhin chhan niin a lang," a ti.

Tlabunga sorkar hotute leh khawtlang hruaitute chuan, Tlabungah kawlphetha a mumal loh avangin mipuiin harsatna hrang hrang an tawh ṭhin thu, Power & Electricity minister ni bawk R Lalzirliana hnenah an lo thlen a; Minister zawhna chhangin Tlabunga P&E department JE-in kawlphetha mumal loh chhan hrang hrangte leh department-in harsatna an tawhte a sawi a ni.

Minister pahnihte hian kum 2019-a Mizoram Ṭhalai Kristian pawl inkhawmpui lian pandal sakna tura ruahman tuilianin a chîm tak, Licheng khelmual leh Missionary Kaite an tlawh nghal bawk.