CM leh sipai hotu an inkâwm

Army recruitment kalphung endik tura Mi­zoram tlawhtu DDG Re­cruiting (NE) Brig. VM Sharma chuan June 20, Nilaini tlai khan chief minister Lal Thanhawla chu CM bangla-ah a kâwm.

Brig. VM Sharma chuan, sipai lak rûnpui neih leh tur chungchanga pawimawh a tihte Chief Minister hnenah a thlen a, "Hmun kilkhâwr leh hmun hla zawka ṭhalai­te'n sipaia luh dan leh a kalphungte an hriat theih nan inhrilhhriatna (aware­ness campaign) nei ṭul," a ti a; Mizo ṭhalai tam zawk Indian Army-ah an luh ngei a beiseipui thu a sawi.

Chief Minister chuan, Mizo ṭhalaite chu Indian Army-a lut tura a duhsak thu leh khua leh tui ṭha, khawtlang leh chhungkua tana mi chhuanawm leh ṭangkai nihna kawng ṭha tak a nih thu a sawi a, "Sorkar pawhin theihtawp chhuahin hma a lakpui dawn a ni," a ti.