Turini lei chim politics-a hamṭhatna atan Hman tum lo turin political party-te ngen
Chalfilh bialtu MLA Dr Ngurdingliana chuan, a bial chhung, Sesawng leh Khawruhlian inkara Tuirini lei chim chu politics-a hamṭhatna lak tumna atana hman tum lo turin political party-te a ngen.
Dr Ngurdingliana hian nimin khan Turini lei dawh tura hmalak mek dan leh mihring kal kaina tur suspension bridge dawh hna thawh mek a hmunah a en a; amah lo dawngsawngtu a bial chhunga V/C leh YMA hruaitu ṭhenkhatte hmaah thu sawiin, "Kan duh rêng vang ni loa thil thleng hi tumahin politics-a hamṭhat lak tumna atan hman tum lo turin bialtu MLA ka nih angin political party-te ka chah a ni," a ti.
Tuirini lei hman lai mek chu a hlauhawm tawha hriat a nih avangin a dawh ṭhatna tur sum a ngaihtuah a ni tih sawiin Ngurdingliana chuan, "PWD hotute remtihnain sorkar laipui ka dawr a, lei dawh ṭhatna turin cheng vbc. 3.96 bakah, tlangdung kawng siamṭhatna atan cheng vbc. 10 chuang min pe a ni," a ti a; lei thar tur dawh a nih mek laia duh vang rêng ni loa a chim chu pawi a tih thu a sawi.
Dr Ngurdingliana chuan, politics-a hamṭhat lakna atana hma la a nih loh thu sawiin, "Min ring ngam a, min thlan tlin angin ka tih tur ka ti a ni.
Hetianga dik lo taka min puhna hian min tihnual loa, min tiṭang sawt. Politics-a hamṭhat lak tum loin, hmar tlangdung hmasawnna atana ngaihtuahna seng zawk turin political party-te ka chah duh a, Tuirini lei hi dawh zawh a ni ngei ang," a ti.
Inkawm khawmna kaihruaitu Khawruhlian Vengthar YMA president Hruailiana Zote chuan, Tuirini lei a chim aṭangin lei hmangtu hmar tlangdung YMA-te'n an theih ang anga hma an lak thu sawiin, "Kan MLA-in min ṭanpuiin min thlamuan ṭhin a, thil tam tak a rawn ti a ni," a ti a; hmar tlangdungin lei chim vanga harsatna an tawh mek chu politics-a inchirhthehna atan tumahin hmang lo se an duh thu a sawi.
PWD hotute sawi danin, Turini lei dawh ṭha tur hian chhun-zan zawmin hna thawh a ni a, lei innghahna tur siam hna chu tunkar chhung hian zawh hman beisei a ni. Harsatna a awm loh chuan July 2018 chhung ngeia dawh zawh hman tum a ni.
Chalhfilh Group YMA chuan, lui dunga lirthei kalna tur an siam tui lianin a lak tak chu vawiin hian hnatlangin an siamṭha leh dawn. Hetih lai hian, tui a len pawha mihring an kal kai theihna turin cheng nuai 13 séngin suspension bridge siam hna thawh mek a ni bawk.
Tuirini lei a chim avang leh a kal kai lailâwkna tuilianin a lak avangin tunah hian lirtheiin Tuirini lei an zawh kai thei lo a, khualzinte chu Aizawl aṭanga lirthei kal leh hmar tlangdung lam aṭanga lirthei lo kalah an inchuan thleng ṭhin. Chalfilh Group YMA-in mau hmanga inkalpawhna an siamah hmangin lui kân theih a ni a, bungraw rit deuhte chu lawng hmanga thiar a ni thung.