MR tan category siam leh leave pek phût

National Trade Union of Mizoram (NTUM) chuan, Mizoram sorkara muster roll (MR) employee-te chu minimum wages ang ringawta chhawr lo a, an hlawh turah category-a ṭhen tur leh chawlh (leave) siam­sak ve turin sorkar an ngen.

NTUM hruaitute hian nimin khan Aizawl Press Club-ah thuthar thehdarh­tute an kâwm a; an presi­dent C Remtluanga chuan, Mizoram sorkara MR employee-te chu sorkarin ran ang lekin a chhawr nia sawiin, "Kum 2008-a workcharged staff-te dinhmun a chawikansak a, dinhmun thar a lo pek ang chiah kha min pe ve thei a ni," a ti.

C Remtluanga chuan, Mizorama MR-a thawkte Mizoram sorkara a ngheta an luh theihna atana quota an neih zat 25% ni ṭhin chu 35%-ah tihsan a nih avang leh, work department (PWD, P&E leh PHE) hnuaia MR 5,000 chuang approval a pek avangin an lawm thu sawi rualin, duh belh an neih thu a sawi a ni.

C Remtluanga chuan, MR-te chu minimum wages ang chiaha hlawh pek an nih thu sawiin, "A aia hniama inchhawr phal lohna (minimum wages) ringawt hmansak a la ni hi khawvel kalphung nena inrem lo nia a lan tawh avangin, ran chhawr ang maia hetia inchhawr lo hian, MR-te hian, dinhmun thar (category) pek leh an nihna chawisan hi kan ngen a ni," a ti.

NTUM chuan MR-te tan thil phût tam tak an nei tih sawiin C Remtluanga chuan, "Kan dinhmun (category) thar min siamsak tur leh kan dil ang hi a vaia min pe rih lo a nih pawhin, Minimum Wage Act 1948 hmang tawh lo a, hlawh bituk thar leh kan mamawh chawlh ve theihna (leave facility)-te hi Model Code of Conduct puan a nih hma ngeia min tihhlawhtlinsak turin sorkar kan ngen a ni," a ti. Thil pahnih bik hi a hlawhtlin theih nan nawr zui zel an tum thu a sawi.

C Remtluanga chuan, MR-te chu minimum wages anga an hlawh bak hamṭhatna dang a nei lo tih sawiin, "Sorkar hnathawk pangngaite anga thawk hah ve tho kan ni a. Mahse, damlo ve thei, damdawi mûm khat leina pawh dawng ve lo, ni khat chawlh pawha hlawh paihsak, kum 60 tlina bàn leh vanduaiin nunna hial chàn pawha cheng khat mah dawn tur nei lo kan ni," a ti a; chu chuan MR-te rahbeh an nihzia a tilang niin a sawi.

NTUM President sawi danin, kumin March thlaa budget session-ah khan, Labour changtu minister-in zawhna a chhannaah, 'MR-te hi Labour Law hnuaia chhawr an ni,' a ti a; Labour Law hnuaia chhawr an ni chung leh Labour Law hnuaia hamṭhatna chi hrang hrang a awm chungin, chu'ngte chu tun thlengin pek an la ni lo.

Labour Law hnuaiah chuan hnathawktute chu a chhawrtuin Employee Provident Fund (EPF) a siamsak tur a ni a, mahse, Mizoram sorkarin tun thlengin MR-te EPF a la siamsak lo. C Rem­tluanga chuan, EPF chungchanga Chief Minister an dàwr tawh ṭhin thu sawiin, "Kan sorkar hotute hian EPF hi ṭha an ti a, mahse, tun thlengin an la ti duh si lo a ni," a ti.

C Remtluanga chuan, MR-te'n an chanvo an hmuh theih nan Court-ah kal ta se, an hneh ngei an rin thu a sawi. Court-a an kal loh chhan zawhna chhangin Remtluanga chuan, "Court-ah kal ila thiam kan chang ang. Tunah chuan Court-a kal loin, nu leh pa hnenah i dil phawt mai ang u, kan ti a ni," tiin a sawi. NTUM hruaitute tarlan danin, Mizoram sorkara department hrang hrangah MR-a thawk mek mi 9,000 vel an awm a ni.