Central Jail-ah Graduation Day hmang

Set Free Ministries (SFM), India chuan Central Jail-a táng mekte tana Bible zirna an buatsaiha zir chhuakte pualin nimin khan Central Jail-ah Graduation Day an buatsaih a, Home minister R Lalzirliana'n a hmanpui.

Graduation Day hi SFM Board chairman Lalkiamlova'n a kaihruai a; Home Minister chuan, jail táng zinga SFM Bible course zir zote chu Pathian duh dan anga an nun hmang zel turin a chah a, "Jail aṭanga in chhuah hunah pawh in Pathian thu zir hian a ṭanpui ang che u. Jail tàn hi hremna angah chauh ngai loin, insiamṭhatna hun ṭha an ni zawk a ni tih hriat reng a pawimawh," a ti.

R Lalzirliana chuan, jail-a an awm chhunga an thlarau nun thlenga ngaihsaktu an nei chu an vanneihzia hre turin jail tángte a chah a, "Pathian hnam thlan pawh inti mah ila, fel lo taka kan tih a, sual kan hawisan duh chuan loh chuan Pathianin a hawisan/hrem ṭhin tih Israel fate chanchin aṭangin a lang chiang hle," a ti a; tángte chu khawtlang leh ram tan mi ṭangkai an nih zel theihna atan duhsakna a hlan.

Set Free Ministries hi USA rama jail tángte zingah rawngbawlna lian tak nei an ni a, India ram chhunga jail hrang hrangah pawh rawngbawlna an neih bakah, Mizoramah pawh Central Jail leh district jail zawng zawngah rawngbawlna an kalpui mek a ni.