Mizo mipui mamawh chhanna tur kan ni - ZPM Vice President

Ṭangrual pawl, Zoram Peoples' Movement (ZPM) Steering Committee vice president Rev.Dr K Thanzauva chuan nimin khan Lunglei Press Club-ah thuthar thehdarhtute a kâwm a; ZPM chu Mizoram mipui mamawh chhanna tur a nih thu sawiin, Mizoram mipuite chu kumina Assembly inthlan hunah ZPM candidate vote ṭheuh turin a sáwm.

Rev.Dr K Thanzauva chuan, Mizoram state a nih aṭanga tun thlengin political party pahnih chauhin ro an la rêl tih sawiin, "Mipui aṭangin party dang enchhin ve duhna a ri ring hle a, chief minister atan Pu Lalduhoma enchhin ve phawt duh an tam hle a ni," a ti a; mipuite chu an chhia leh ṭha hriatna fim tak hmanga ram roreltu turte thlang turin a chah.

Mizoramah political party rorel tawhte'n a záwna term hnih aia rei rorel an tlin Io nia sawiin K Thanzauva chuan, Party thar din loin, party pahnih ro inrêl chhâwk mai se la, tih ngaihdan hi ṭha âwm tak a nih laiin, tuna kan kalphungah chuan party ngai, hruaitu ngai rengin ro an rêl ṭhin. America leh democracy ram tam berah chuan hruaitu ngaiin term hnih aia rei rorelna an chelh thei lo. A lal ngai reng, tihdan ngai reng kum 10 aia rei hman hi a ṭha lo a ni," a ti.

ZPM Vice President chuan, an pawl chu Mizoram mipui mamawh chhanna tur nia sawiin, "ZPM a sorkar chuan kalphung thar, mipui sorkar din a ni ang. Kalphung thar kan tih hian hruaitu inthlak mai ni loin, tih dan ṭha lo leh ṭangkai lo kal kânin, kalphung thar kan siam dawn a ni," a ti a; sorkar khalh ngil turin Val Upa Council a awm dawn thu a sawi.

Rev.Dr K Thanzauva sawi danin, ZPM a sorkar chuan Chief Minister-in portfolio a nei dawn lo (department enkawl bik a nei dawn lo) a, minister-te hnathawh a enpui ang. Party sorkar ni loin, mipui sorkar an din dawn a; huap zo sorkar, rethei leh hausa inthliar hranna awm lohna sorkar an din dawn a ni.

K Thanzauva chuan, ZPM a sorkar chuan kut hnathawktute thawh chhuah man man taka lei a nih tur thu te, development bank din a nih dawn thu te, mipui mamawh pe turin 'Six Basic Needs' an kalpui dawn thu te, zirna an siamṭhat dawn thrte a sawi a, "Politic khelh nana education hman ṭhin hi tihtawp a ni ang," a ti.

Rev.Dr K Thanzauva hi Lunglei lam enkawl tura dah a ni a; Lunglei chungchang sawiin, "Hma kan Io lak tawhna chhunzawmin Lungleiah Commissioner kan dah ang a, chu chuan chhim biala DC-te a khaikhawm ang. MZU Southern Campus siam tura hma kan lo lak tawh hi a takah chantir thuai kan tum ang," a ti. Tlabungah international border trade tipuitling turin an bawhzui dawn thu te, Lunglei leh Tlabung inkar chu kawngpui four lane-a zawm a nih tur thute a sawi bawk.