Congress tihchhiat kan siamṭha vek dawn - Zoramthanga

MNF president Zo­ramthanga chuan, MNF an sorkar chuan zu leh ruih theih thil vanga harsatna thlengte tihdam hna an thawk dawn tih sawiin, "Zu zawrh kan titawp dawn a... Congress-in kan ram an tihchhiat tawh hi kan siamṭha leh vek dawn," a ti.

Nimina Zemabawk MNF Unit-IX ten an party zawm thar lawm luh­na inkhawm an buat­­saihah thu sawiin Zo­­ramthanga chuan, "Cong­ress-in kan ram a tihchhiat tawh hi kan siamṭha leh vek dawn a. Kan hma lawka inthlanna lo awm turah hian sum hmanga inthlêmna nasa tak Congress hian an ti dawn a, chu'ng sumte chu nangmahni chan tur tho a ni a, lo la u la, vote erawh in ba lo," a ti a; mipuiin Congress an thlan tlin leh chuan a hma aiin Zoram hi chhiat belh rawh se, tihna ang a nih tur thu a sawi.

MNF sorkarah chuan zu leh ruih theih thil dangin a tihbuai chhungkaw tam takte chi hriselna lama zirtirna ṭha leh eizawnna ṭha zawk nen a tihdam hna an thawk dawn tih sawiin Zorama chuan, "A tihdamna hmunpui kan siam dawn a, zu zawrh hi kan titawp ang," a ti.

Zoramthanga chuan, hun rei lo têah an sorkar tawh dawn nia sawiin, "Kan SEDP hmangin a duh leh thawk peih tak takte tan a vah man, a chi man, a thawh chhung ei tur nen, a hralhna thlengin sorkarin kan buaipui ang. Kan sorkar aṭanga kum 5 hnuah chuan chhung tin sum lak luh a pung nasa hle ang. Lehkha thiam leh thiam lote tan pawh an thawh theih tâwk eizawnna ngêlnghet kan siamsak dawn a ni," a ti a; chhungkaw tinin kum khatah Rs. 3,00,000 leh a aia tam an la lut dawn niin a sawi.

MNF President chuan, Mizoram hmun tinah mipuiin MNF an zawm thar zel nia sawiin, "Opposition, engmah pek tur nei ve lo kan nih laia heti khawpa kan party zawmtu an pung zel hian Congress sorkar tlak tur leh MNF sorkar lo piang tur a entir a, Congress sorkar hi mipuiin an kham tawhzia a kâwk bawk," a ti.

MNF thuchhuah chuan, nimina Zema­bawka lawm luhna inkhawmah hian MNF President-in party hrang hrang aṭanga leh neutral mi 84 MNF-ah a lawm lut niin an tarlang a; nimin vek khan MNF senior vice president Tawnluia'n Mizo Hnam Runah voter 51 a lawm lut niin an tarlang bawk.