Kum 1986-a hawn Sesih PHC-ah kum 32 chhung doctor an la awm lo

Sesih Branch YMA chuan thuchhuah siamin, kum 1986-a din Sesih damdawi-in, Primary Health Centre (PHC) chu hawn a nih hnu kum 30 liam hnuah pawh doctor dah a la nih loh thu an tarlang.

Sesih YMA tarlan danin, Sesih PHC hi kum 1986-ah sak zawh niin, chutih laia Health minister Vaivenga'n June 1986-ah PHC puitling ni tur leh PHC kal dan tur pangngai ang thlapa kal turin a hawng a ni. Hawn a nih hun lai chuan a building chu duhthusama ṭha a ni lo a, mahse, kum 1996-ah sa ṭhain, kum 2012-13-ah staff quarters pahnih leh kum 2014-ah doctor quarters tur leh nurse quarters tur sak leh a ni.

Sesih PHC hi Lianpui, Leisenzo, Khuangleng khaw mipuite’n inentir nan bera an hman ṭhin a ni a, Myanmar rama Khawthir khua aṭang pawhin inentir turin an kal ṭhin. Tunlai hian Sesih PHC-ah damlo an khat deuh reng a, khum 10 awmin, khum ruak a awm ngai meuh lo. Tunah hian Sesih PHC-ah hian thawktu nurse pahnih (mipa leh hmeichhia pakhat ve ve), health worker pakhat leh IV grade pali an awm mek a ni.

Kum 30 chuang PHC ding tawh si, vawi khat mah doctor dah a la ni lo chu Sesih khaw mipuite'n lungchhiatthlak an tih thu tarlangin Sesih YMA chuan, "Ngaihsak kan hlawh lo bik a ni. Khawngaih taka Sesih PHC-ah doctor kan neih vat theih nana hma min laksak turin Mizoram sorkar chak tak hi kan ngen a ni," an ti.