KHAWTHLIR

Free clinic
Roman Catholic behchhan pawl pahnih - Caritas India leh Zoram Entu Pawl-te chuan June 20-21, 2018 khan Tlabung leh Nunsury-ah a thlawna inentirna an buatsaih. Tlabungah hian mi 320 vel an inentir a, Nunsury-ah mi 250 vel an inentir thung a; damdawite a thlawna an sem bakah, naupang kum 2 hnuai lam hnenah an mamawh chi hrang hrang sem a ni.

Thisen pe
Airtel company-a thawkte chuan nimin khan Aizawl Civil Hospital-ah thisen unit 12 an pe a, a petute mipa 11 leh hmeichhia pakhat an ni.

B.D result chhuak
Senate of Serampore chuan tun hnai khan Bachelor of Divinity (BD) result a tichhuak a, Aizawl Theological College aṭanga BD final year exam mi 19 an pass a, mi pakhat result tihchhuah a ni rih lo. A- ah mi pathum, B+ ah mi 12 leh B ah mi pali an pass a ni.

Website tlangzarh
Mizoram University-a Mizo department-in an tihchhuah Mizo Studies journal website thar chu nimin khan MZU vice chancellor Prof. KRS Sambasiva Rao-a'n MZU Guest House-ah a tlangzarh. Mizo Studies hi thla thum dana chhuak (quarterly refereed journal) a ni a, July-September 2012-ah chhuah ṭan a ni.

Stadium hawng
Teikhang khuaa BADP sum hmang indoor stadium sak chu June 21, Ningani khan bialtu MLA H Rohluna'n a hawng. Indoor stadium hi kum 2014-15 ah cheng nuai 10 sênga sak ṭan a ni a, kum 2015-16 chhungin stadium sakna atan hian cheng nuai 15 hmuh belh a nih bakah, MLA fund Rs. 4,50,000 hman a ni bawk.

Tlân theih loh
Traffic SP chuan thupek chhuahin, zanin dar 7 aṭanga Pathianni zanlai thleng Saron Veng - Tuithiang Veng leimin thenfaina laia tui luankawr siam hna an thawh a nih dawn avangin, he kawngpuiah hian hna thawh chhungin lirthei tlan khap a nih thu a puang.