Mahni post-a awm duh lo zirtirtute Hmasawnna dâltu an ni - Awmpuii

Bungtlang Educational Service Association (BESA) chuan nimin khan an khuaah zirna chungchang inzirtirna an buatsaih a; khuallian, bialtu MLA Vanlalawmpuii Chawngthu, minister chuan, zirtirtu, an post-a awm duh lote chu ram hmasawnna dâltu an nih thu a sawi.

Vanlalawmpuii Chawngthu chuan, zirtirtu, mahni thawhna hmuna awm ṭha duh lo leh hnaa tuina nei lote chu ram hmasawn zelna dâltu pakhat an tling tih sawiin, "Rawngbawlna pawimawh tak, mi dangte ṭanpuina remchang leh naktuka kan ram hmélhmang lang chhuak tur chhertute an nih avangin an thawhna hmun ṭheuhah tui leh phûr taka an thawh reng theih a ṭul a ni," a ti.

Ram changkang apiangin zirna an uarin an ngaihlua, a rah pawh an chhawr nasa ṭhin tih sawiin Vanlalawmpuii chuan, "Thiamna leh finna hi in­chhuhsak theih loh rohlu a nih avangin mihring tan a pawimawh em em a ni," a ti a; khawvel chu a tling leh a thiam apiangte dinchhuahna a nih avangin zirlaite tan ṭan nasat a ṭul thu a sawi.

Inkhawm hi BESA president C Remsanga'n a kaihruai a, kumpuan thupui 'Zirna uar kum' tih chu Serchhip DEO Lawmawma leh MYC officer TC Lalremsiama ten an sawi a ni.