World Blood Donor Day hmang

Association for Voluntary Blood Donation (AVBD), Lawngtlai district huaihawtin nimin khan JH Lorrain Hall, Lawngtlaiah 'World Blood Donor Day' hman a ni.

World Blood Donor Day puala inkhawm buatsaih hmanpuitu Lawng­tlaia IPRO C Lalhruai­tluanga chuan, thisen pek chu mi dangte tan malsawmna nih theihna sang ber a nih thu a sawi a, "Thisen pek hi Krista anna a ni. Thisen petute'n mi nun an chhanhim mai ni loin, an thlarau pawh an chhanhim tel a, thlarau bo man theihna kawng pawimawh tak a nih avangin ringtute tan chuan thisen pek uar deuh deuh chi a ni," a ti.

Lawngtlai AVDB president Elvis Lalthangzuala chuan, WBDD chu June 14-ah hman ṭhin ni mah se, a ní takah an hman theih loh avangin nimina hmang an nih thu a sawi a, kal khawmte chu thisen pek uar deuh deuh turin a sáwm.

Inkhawma tarlan dan­in, Lawngtlai District Hospital blood bank-ah kum 2017 chhungin thi­sen unit 1,064 pek a ni a, chu’ng zinga unit 745

(70%) chu voluntary donation niin, unit 319 (30%) chu damlo tih bik tana pek (replacement) a ni. Kum 2018 bikah chuan May 2018 thleng khan thisen unit 494 pek a ni tawh a, voluntary donation unit 361 (73%) leh replacement unit 133 (27%) a ni.