MURA-in chaw nghei chhunzawm zel

Mizoram Underground Returnees Association (MURA) member-te chuan Congress party nena kum 2008-a thuthlung an siam tihpuitlin phûtin chaw an nghei zel. Nimin khan thu­chhuah siamin, an thil phût chungchangah hian Mizoram sorkar hmalakna Mizoram mipuiin an thlir mek niin an tarlang.

MURA chuan, kawhmawh bàwl vanga chaw nghei an ni lo a, chhan leh vâng awm leh phût neiin June 6, 2018 tlai aṭanga chaw nghei an nih thu sawiin, "Chaw kan nghei chhung hian MPCC aiawhte nen ṭum li lai kan inbiakah MURA-te'n kan nawrh chhan demand lam hawia inbiakna leh sawihona mumal a la awm lo," an ti.

MURA chuan, MPCC nena an inbiak hnuhnung ber June 19, 2018-ah, Chief Minister leh MPCC aiawhte nen June 25-30, 2018 chhung ngeia a hma thei anga inbiakna nei tura tih a nih thu an tarlang a, inbiak remna leh thuthlukna fel tak a awm theih ngei beisei chungin chaw ngheiin, ram mipui­te pawhin an thlirpui mek niin an sawi bawk.