Reserved forest ṭhiahna thupek khinna Gauhati High Court-in a ngaihtuah ṭan

Gauhati High Court, Aizawl Bench-in January 27, 2021-a Mizorama lui 16 kam, reserved forest ni ṭhin a ṭhiahna thupek khin lêtna chu nimin khan Gauhati High Court, Aizawl Bench vêkin a ngaihtuah ṭan. January 27, 2021-a thupek hi a kaltlang a nih chuan Mizoram sorkarin Tuirial Hydro Electricity Project-ah zangnadawmna atan cheng nuai 3,000 chuang a sèn belh a ngai dawn a ni.

Environment, Forest & Climate Change (EFCC) minister TJ Lalnuntluanga chuan, May 7, 2021-a Vanglaini palai zawhna a chhannaah, Gauhati High Court thupek khing lêt turin hma an lak thu a lo sawi tawh a, "Páwng khin lêt mai theih a ni lo a, uluk taka case zir chianga inbuatsaih a ṭul. Covid-19 avangin inbuatsaihna a kal chak thei lo. Department chuan lui kamte reserved forest nihtir loh hi ṭha kan ti lo a, chuvangin, khin lêt ngei kan tum a ni," a ti.

High Court thutlukna chungchangah hian Central YMA chuan Mizoram sorkarin hmalak a tum lo nia an hriat avangin, thupek sût a nih theih nan Gauhati High Court thupek khin lêt an tum hman bawk.

Reserved forest ni ṭhin ṭhiahna thupek khin lêtna hi Gauhati High Court Aizawl Bench-ah nimin khan pharh a ni a, mahse, Mizoram sorkarin document thehluh belh a duh avangin thutlukna siam a ni lo. Mizoram sorkarin document a thehluh belh hnuah thupek khin lêtna chu ngaihtuah leh a ni dawn a, ngaihtuah hun tur ruat a la ni lo.

Vanglaini thu dawn danin, Mizoram Chief Secretary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a section ṭhenkhat chu mi 681-in Gauhati High Court-ah an khing a ni.

The Mizo District (Forest) Act, 1955 chungchanga sorkar order leh notification chu High Court-in a ṭhiat a, chuvang chuan mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn.

Chief Secretary order leh January 28, 1965-a notification ang chuan, Tuirial HEP siamna atana ram lâk neitu mi 681-te ram chu reserved forest chhunga awm a nih avangin zangnadawmna an dawng thei lo a, mi 681-te chu Gauhati High Court-ah an zualko a ni. High Court chuan thutlukna siamin, mi 681-te chu an chak a, mi 681 hnenah Mizoram sorkarin zangnadawmna a pek a ngai dawn a ni.