MNF-in skywalk leh ropeway-ah Lokayukta-ah complaint thehlut

MNF party-a Vigi­lance department leh Legal Board-te chuan Sakawrhmuituai tlanga skywalk leh Chaltlang-Durtlang inkara ropeway siam chungchangah nimin khan MNF Vigilance department joint secretary Lalmuanchhana Sailo hmingin Lokayukta-ah complaint an thehlut.

MNF chuan, Swadesh Darshan Scheme-II hnuaia Mizoram Touri­sm hmasawnna tura hmalaknaah thil dik lo leh fel tâwk lo a awm ngeia a lan avangin complaint an thehlut tih an tarlang a, "Dan bawhchhia an awm a nih chuan dan hnuaiah hrem an nih ngei theih nan a rang thei ang bera hma min laksak nghal turin Mizoram Lokayukta kan ngen a ni," an ti.

MNF tarlan danin, kum 2018 khan Mizoram sorkarin restricted tender hmangin Sakawrhmuituai tlanga skywalk leh Durtlang-Chaltlang inkara ropeway siamtu tur contractor atan NEIP leh Ropeway & Resorts Pvt. Ltd. New Delhi-te a thlang a; contractor-te hnenah hian mobilization advance 10% pek chhuah tur a nih laiin, 10% aia tam Tourism department chuan a pe chhuak a ni.

Sakawrhmuituai tlang skywalk atan 10% mobilization advance zat tur chu cheng nuai 48.50 a nih laiin cheng nuai 287.25 pek chhuah a ni a; Durtlang-Chaltlang ropeway atan 10% mobilization advance zat tur chu cheng nuai 248.25 a nih laiin cheng nuai 1,317.80 pek chhuah a ni. Mobilization advance sumte chu Tourism department-in kum 2017-2018 inkarah a pe chhuak niin a lang.

Sum tam tak contractor-te hnenah pek a ni tawh chungin project pahnihah hian hmalakna mumal hmuh tur tun thlengin a la awm lo tih sawiin MNF chuan, "Swadesh Darshan Scheme-II chungchangah hian thil dik lo, sorkar sum leh pái hman dik tâwk lohna leh dan bawhchhiatna a awm ngei niin a lang," an ti a; sum tihchingpen nia langah a mawhphurtu mipuiin an hriat duh bakah, dan hnuaia hmalak ngei an duh niin an tarlang.

Swadesh Darshan Scheme-II hnuaiah component dang a la awm nual tih sawiin MNF chuan, "Thil fel lo, sum leh pai hman dik lohna leh dan bawhchhiatna dang pawh awm thei a ni. Chuvangin, uluk leh ngun taka min chhui chhuahsak a, dan bawhchhia an awm a nih chuan dan hnuaiah hrem an nih ngei theih nan a rang thei ang bera hma min laksak nghal turin Lokayukta kan ngen a, complaint kan siam a ni," an ti.