Chalfilh tlánga sorkarin in a sakte Khanpui khawtlangin ṭhiah an duh lo

Chalfilh tlang, Vanzaua Mizoram sorkarin Tourist Destination Pro­ject hmanga in a sak zawng zawng thla khat chhunga ṭhiat vek tura National Green Tribu­nal (NGT) Eastern Zone Bench, Kolkata-in Mizo­ram sorkar a hriattir chungchangah, Khanpui khawtlang chuan in sak tawhte chu ṭhiah an remti lo nia thu dawn a ni.

Tarlan tawh angin, Mizoram sorkarin Chalfilh tláng chhîpa khualzinte hîpna tura Tourist Desti­nation Project a kalpuiah forest clearance dil lo leh nei hmasa loa hma a lâ a, in eng emaw zat a sak avangin Centre for Envi­ronment Protection chu August 25, 2017 khan NGT-ah an zualko. NGT chuan November 17, 2021 khan thupek chhuahin, sorkar hmalakna awm tawhte chu thla khat chhunga ṭhiata thian fai vek tur leh January 7, 2022-ah hmalak dan a thlalak nen NGT-a thehlut turin Mizoram sorkar a hriattir a ni.

Vanglaini zawhna chhangin Khanpui VC president Lalrochunga chuan, an khaw mipui sûkthlêk aṭangin Chalfilh tlanga in sak tawhte ṭhiah chu ṭha an ti lo tlang nia a lan thu a sawi rualin, thutlukna an la nei lo a, nizan khan VC kaihhruaiin tlawmngai pawl hrang hrang aiawhte kokhawmin an ngaihtuah dawn thu a sawi.

Lalrochunga chuan zawhna chhangin, "Tuna mipui sûkthlêk aṭang hi chuan in sak hote ṭhiah kher hi ṭha kan ti lo tlang niin a lang a, tuna a awm ang hian ṭha taka humhalh a ṭha tâwkah kan ngai," a ti. Hetih lai hian, Chalfilh tlang hi humhalh turin Chalfilh Group YMA chuan hma a la mek a; tun hnaiah pawh Central YMA, PHE leh Environment, Forest & Climate Change department-te nen 'Chalfilh tláng humhalhna awareness campaign cum Chalfilh tláng Forestry & Watershed Management' an buatsaihho tawh a ni.

Chalfilh Group YMA JW Lalrinawma chuan Vanglaini palai zawhna chhangin, NGT thupek chungchang chu a la hlimchhàwn deuh avangin Group YMA-in an la sawiho loh thu leh pawl ngaihdan a sawi theih rih loh thu a sawi.

JW Lalrinawma chuan ama ngaihdan sawiin, Chalfilh tlang humhalh tura Group YMA hmalaknate ngaihtuahin NGT thupek chu a ṭha tawk hlea ngaih theih a nih thu a sawi a, "Chalfilh tlang humhalh hi ka duh hrim hrim a, hei bak hi chu (NGT thupek) a awm thei bik dawn em ni tih tur a ni a, sorkarin hma a la a nihte chuan a lawmawm lam ni turah ka ngai," a ti.

Chalfilh tlang huam chhungah periodic patta nei mi 67 an awm thu sawiin JW Lalrinawma chuan, "Anni chuan dan kalha ram nei kan ni bik lo, an ti a, a dik ve reng thoin a lang," a ti a; sum tam tak sen tawhna inte tihchhiat chu a uiawm zawng pawha ngaihtuah theih a nih thu a sawi.

Chalfilh YMA Secretary sawi danin, Chalfilh tlang huam chhunga ram (periodic patta) neite chu Group YMA-in inhnûkdâwk turin an ngen a ni. Ram neitute awmna khuaa YMA branch-te pawh lo bawhzui turin an inchah angin an bawhzui a, periodic patta neite list pawh Group YMA-in an kawl tawh a ni.