Rabung dáia lirthei chesualah Aiduzawl khaw mi paruk an thi

Nimin chawhma dar 10:10 khan Aiduzawl, Khawzawl district aṭanga an khaw ṭhenawm Rabung khuaa mitthi rál tura kalte chuanna lirthei, Mahindra Pik-up chesualin, kawng thlangah a lum a, lirtheia chuang mi paruk an thi.

Khawzawla police hotute sawi danin, lirtheiah hian mi 19 an chuang a, Rabung khaw luh hma km. 1 vela hláah kawng chhuka a tlân laiin kawng thlangah a tlan liam a, Singzawl kawng, ft. 30 vela sángah an tla thla a ni. Lirthei chetsual chhan hi a khalhna (steering) a ṭhat loh vang nia hriat a ni.

Lirthei chêtsualna hmunah hian mi pali - F Vanlaldinga (56), Lalsawta (54), Zahliri (47) leh Lalruatkimi (40)-te an thi nghal a, Zonunsangi (45) chu Rabung damdawi-in (PHC) thlenpui a nih hnuah a thi. Tlai dar 3:15 vel khan Lalbuatsaihi chu a hliam tuar loin Rabung PHC-ah a thi ve leh a ni.

Lirthei chetsualnaa hliam zinga na zual mi pariat chu enkawlna ṭha zawk dawng turin nimin vêk khan Aizawl panpui an ni a, mi pathum chu Rabung PHC-ah enkawl zui an ni.

Lirthei chesuala thite hi nizan khan an khua­ah lumen an ni a, vawi­inah vui an ni ang. Kum 2011 chhiarpuia a lan danin, Aiduzawlah hian chhungkua 61 an awm a, mi 326 chêngin, mipa 161 leh hmeichhia 165 an ni.

Khawzawl DC CC Lal­chhuangkima chuan nimin khan Rabungah lirthei chetsualna avanga nunna chan leh hliam tuarte tlawh nghalin, ralna leh kanna thilpek a hlan.