A hun taka hlawh pe ṭhin turin Sorkar hnathawkte'n sorkar an ngen

Federation of Mizoram Govern­ment Emloyees & Wor­kers (FMGEW) chuan, tun hnaia Mizoram sorkarin sorkar hna­thawkte hlawh a pe tlai leh Dearness Allowance (DA)-a an chanvo a pe mai lo chu pawi an tih thu an tarlang a; a hun taka hlawh pe zel turin sorkar an ngen.

FMGEW chuan, February 28, 2021-a Supreme Court order chuan, sorkar hnathawkte chu a hun taka hlawh pek ṭhin tur an nih thu leh pek tlai an nih chuan a pung (interest) nena pek tur a tih thu an tarlang a, "Chutih laiin, hun eng emaw chen aṭang khan Mizoram sorkar hnathawk eng emaw zat chuan a hun takah hlawh kan la thei ṭhin lo a, harsatna tâwk tam tak kan awm mek a ni," an ti.

Sorkar hnathawkte'n hlawh an lâk tlai avangin mi tam tak khawsak a buai phah hle ṭhin tih sawiin FMGEW chuan, "Sorkar hnathawk tam tak hi loan chi hrang hrang la kan ni hlawm a, a hun taka hlawh kan lak loh pawhin kan loan lâkte a hun taka rulh a ngai tho si a, a hun taka loan kan rulh theih loh avangin penalty kan chawi ta ṭhin a, pawisa tam tak kan chawi a ngai ta ṭhin a ni," an ti a; Mizoram sorkar chu a hun taka hlawh pe ṭhin turin an ngen a ni.

FMGEW chuan, dearness allowance (DA) chu mihring khaw­sak mamawh man sànna rate, Consumer Price Index (CPI) aṭanga chhûtin sorkar hnathawkte DA pek tur zat (rate) siam a ni ṭhin tih an sawi a; Mizoram sorkar hnathawkte DA rate chu sorkar laipuia hnathawkte rate ang zel pek tur a ni tih Pay Rules-ah chiang takin ziah a nih thu an tarlang.

July 1, 2021 aṭangin sorkar laipui hnathawkte chu DA 31% pek an nih tawh laiin, Mizoram sorkar hnathawkte chu 17% chauh pek an la ni tih sawiin FMGEW chuan, "Sorkar hotute hnenah rules anga DA min pe ve tura ṭum thum ziaka kan thlen tawh chung leh ṭawngkaa hotute kan dàwr hnu pawha tihhlawhtlin a ni lo hi pawi kan ti tak zet. Sorkar sum harsat avangin DA punna hi min pe chhuak loin, GPF-ah an dah a nih pawha kan hriatthiam theih tur thu thlengin sorkar hotute hnenah kan hriattir tawh bawk," an ti.

FMGEW chuan, rules anga DA pe thuai turin Mizoram sorkar an ngen a; an chanvote an hmuh theih nan a ṭul angin hmalak zel an tum thu an tarlang bawk.