ICFAI University-in convocation hmang

ICFAI University, Mizoram chuan nimin khan an campus-ah Convocation vawi 9-na an hmang a, Higher & Technical Education (HTE) minister Dr R Lalthangliana'n hmanpuiin, zirlai ti ṭhate hnenah medal a sem.

HTE Minister chuan, graduate tharte a lawmpui thu sawiin, hlawhtlinna chang rih lote chu beidawng loa nasa lehzuala ṭan la turin a chah a, "Education-ah hian sorkar chauhin mipui mamawh a phuhru séng lo a, private leh pawl din institution ṭha tak tak lo piang zel hi a lawmawm. Mimal leh pawl din zirna inte hian an hlâwkna tur piah lamah mi thiam chher chhuah hi dah pawimawh hmasa ber se ka duh," a ti.

ICFAI chancellor Prof. JP Ramappa chuan, ICFAI University thil tum lian ber pakhat chu zirlai chhawr tlak chher chhuah a nih thu sawiin, "Mizoramah chauh ni lo, India ram khawi hmunah pawh zahpuiawm lo tur zirlai hman tlak chher chhuak turin theihtawp kan chhuah zel a ni," a ti a; Mizoram sorkar leh ICFAI University, Mizoram thawh dun tawhnate lawmawm a tih thu leh chhunzawm zel a duh thu a sawi.

Convocation-ah hian under graduate leh post graduate zir chhuak mi 333 hnenah degree hlan a ni a; zirlai ti ṭha zualte hnenah gold medal leh silver medal hlan a ni.

Mizoram Legislative Assembly-in kum 2006-a ICFAI University Act a pawm angin ICFAI University hi Mizoramah din a ni a; MBA, M.Com, MA, MSW, MSc (Geog), BBA, BCA, BBA H&T, BA leh B.Com-te zir theih a ni.