Bike-a India ram fang turte vailiam

Azaadi Ka Amrit Mahotsav puala Border Roads Organization (BRO)-in India ram fang chhuak tura Motorcyle Expedition an buatsaiha Aizawl leh Kolkata inkara tlân turte chu, nimin khan Project Pushpak buatsaihin Pusphak Primary School, Falkand Veng aṭangin Sports & Youth Services minister Robert Romawia Royte-in a vailiam.

Robert Romawia Royte chuan, BRO chu Mizorama kawng sialtu hmasa an nih thu sawiin, tun thlenga Mizoram hmasawnna, a bik takin inkawlpawhna chungchangah thawktu pawimawh tak an nih thu a sawi a; BRO-in motorcyle expedtion an huaihawt chu a lawmpui thu sawiin, "Hetiang adventure sport-te hi Mizo ṭhalaite tuihâlna a ni a, a bik takin motor sport tihlar nan Lengpuiah Rural Electrification Corporation puihnain motor sports complex sak tum a ni," a ti.

Sports Minister hian Motorcycle Expedition-a telte hnenah ngaihhruina leh BRO-a ṭang tawh ex-servicemen leh BRO-a thawk ṭhin thi tawh nupuite hnenah BRO-in thilpek an buatsaih a hlan nghal a ni.