Sorkarin scholarship sum a pe chhuak

Mizoram sorkar chuan Post Matric Tribal Scholarship to ST second instalment sum zirlaite hnena pek tur Rs 1,54,54,000 chu nimin khan a pe chhuak a, Aizawl North Treasury-in release order a tichhuak.

Tarlan tawh angin, Mizo Students’ Union (MSU) Gen. Hqrs chuan, Post Matric Tribal Scholarship chu November 22, Thawhṭanni (nimin) ral hma ngeia zirlaite hnena pe turin Mizoram sorkar an phût a; hun tiam chhunga pek a nih loh chuan na zawka hmalak an tum thu an puang a, sorkar chu zirlaite ngaihthahah an puh bawk. MSU hun tiam ral hmain sorkar chuan scholarship sum a pe chhuak ta a ni.

MSU chuan, "Kum 2020-21 atana Post Matric Scholarship to ST sem hmabak second instalment zirlaite hnena sem chhuah a la nih loh chungchangah November 20, 2021-a kan thuchhuah angin, November 22, 2021 ral hma ngeia scholarship sem chhuak tura Mizoram sorkar kan phûtna vawiin November 22-a Treasury North-a release order tihchhuah a ni ta hi lawmawm kan ti tak zet a ni," an ti.

Zirlaite’n kum dang aia scholarship an hmu har chu pawi an tih thu sawiin MSU chuan, "Session tharah chuan a hun taka zirlaite’n kan chanvo kan hmuh theih nan kan state sorkar chu theihtawp chhuaha zirlaite ngai pawimawh lehzual turin kan ngen a ni," an ti a; kum 2020-21 atana sem hmabak scholarship second instalment la dawng lo zirlaite chu an bank account khawih che turin a chah nghal a ni.