KHAWTHLIR
Thisen pe
ṬKP, Paithar Pastor Bial chuan November 20, Inrinni khan R Vanhne BCM biak-inah thisen pek an huaihawt a, Lawngtlai District Hospital tan thisen unit 51 an pe a, petute mipa 43 leh hmeichhia pariat an ni.
LS MP-in kâwm
Lok Sabha MP C Lalrosanga chuan nimin khan Assam Rifle DIG Brig. Digvijay Singh a kâwm a, Aizawl aṭanga Assam Rifles sawn chhuah dan tur leh Myanmar nena inrìna hrûla Assam Rifles-te hnathawh dante a sawipui. C Lalrosanga hian nimin vek khan Aizawla BSNL pisa a tlawh a, BSNL kaltlanga Mizorama biakhmuhna lam tichangtlung tura Mizorama BSNL hotute mamawhte chu an hmunpuiah thlensak a tum thu a hrilh.
Zofate haw rûnpui
Zoram Thar Zofate Lairelna Inpui hruaitute chuan nimin khan Aizawl Press Club-ah thuthar thehdarhtute an kâwm a, December 16-18, 2021 chhungin Thenzawl Kanan Phaipuia Zofate Pathian Biakinpuiah 'Zofate Haw Rûnpui/Hnam Inkhawmpui Thianghlim’ an buatsaih dawn tih an puang. Inkhawmpuiah hian Zofate Hnam Lungphun an siam chu hawn a nih tur thu an sawi.
Gerbera tiak sem
ICAR - Indian Institute of Horticulture Research (IIHR), Bengaluru leh Aizawl district Agricultural Technology Management Agency (ATMA)-te chuan nimin khan pangpar chíngtute hnenah tissue culture hmanga tihpun Gerbera pangpar ṭiak an sem. He hun hi Agriculture director Rohmingthanga Colney, ATMA state nodal officer-in a hmanpui a; Tlangnuam, Darlawn leh Aibawk RD block chhunga pangpar chíngtute hnenah Gerbera ṭiak sem a ni.
Vawk vulh zirna
MYC leh Khawzawl District Core Team on Skill Development-te buatsaih, vawk vulh chungchang inzirtirna chu nimin khan Khawzawl DC CC Lalchhuangkima'n KVK Training Hall-ah a hawng. Training hi Mizo ṭhalai, Mizoram páwna hna thawk, Covid-19 vanga chhunzawm thei lote tana buatsaih a ni a, senso tur sum NEC aṭanga dawn a ni. Training turin mi 20 thlan an ni.