November thlaah Covid-19 vei Mi 10,373 hmuh a ni tawh

November 21, Pathianni khan Mizo­ramah Covid-19 vei mi 212 hmuh belh a ni a, November thla chhungin mi 10,373 hmuh chhuah a ni tawh. Nimin khan tlai dar 5 thlengin hripui vei dam tawh mi 357 chhuahtir an ni a, Covid-19 vanga thi an awm lo.

Covid-19 vei hmuh thar 212-te chu mipa leh hmeichhia 106 ve ve an ni a, Rapid Antigen Test hmanga hmuh chhuah vek an ni. ZMC laboratory, TrueNAT leh Fluorescent Immunoassay hmangin swab sample endik a ni lo.

IDSP record angin, Mizoramah Covid-19 vei 1,31,897 hmuh chhuah a ni tawh a, mipa 63,853 leh hmeichhia 68,044 an ni a, mipa aiin hmeichhia 4,191-in an tam zawk. Nimin tlai dar 5 thleng khan mi 1,27,029 (96.31%) chhuahtir an ni tawh a, mi 479 (0.36%) thi tawhin, enkawl mek mi 4,389 (3.33%) an awm.

November 21, Pathiannia Covid-19 vei hmuh thar mi 212 zingah symptom nei mi 157 an awm a, mi 55 chu symptom nei lo an ni. Pathiannia swab sample endik aṭanga hripui vei hmuh zat (positivity rate) a sang hlawm hle a, Lawngtlai district-ah chuan 100% a ni. Serchhipah 80.00%, Aizawlah 28.65%, Mamitah 28.57%, Lungleiah 23.81% leh Champhaiah 10.30% a ni bawk. Hetih lai hian, Siaha district-ah chuan a záwnin ni thum chhung sample endik a awm tawh lo.

Covid-19 positive hmuh chhuah thar 212 zingah zirna-in leh inkhung khawmnaa hmuh an awm nual a; Mount Carmel School hostel-ah mi 29 leh Home Missions School hostel-ah mi pakhat hmuh chhuah a ni. Mt. Carmel School-ah hian November 20, Inrinni khan mi 41 hmuh chhuah a lo ni tawh bawk.

November 2021-ah ni 21 chhungin Mizoramah Covid-19 vei mi 10,373 hmuh chhuah a ni tawh a, chawhrualin ni tin mi mi 493.95 hmuh chhuah an awm ang a ni. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 21, 2021 thlenga swab sample endik tawh 13,99,505 aṭanga RT-PCR hmanga endik zat percentage chu 22.97 a ni a, RAT hmanga endik zat chu 71.12% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,31,897 chu mi 1,000 zelah hripui vei mi 120 an awm ang a ni a; mi 1,00,000 zela Covid-19 vangin mi 49 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 357 chhuahtir an ni a; Lunglei district-ah mi 127, Aizawl district-ah 111, Champhai district-ah 35, Khawzawl district-ah 32, Lawngtlai district-ah 23, Mamit district-ah 16, Siaha district-ah pariat leh Hnahthial district-ah mi panga an chhuak a ni.