Covid-19 dinhmun sawiho

Aizawl District Level Task Group on Covid-19 chu nimin khan an chairman Dr Lalhriatzuali Ralte, DC hoin an ṭhukhawm a, Aizawl district chhunga hrikai dan te leh Krismas leh kumthar lo thleng turah mipuite inkaihhruai dan tur an sawiho.

Meeting-a tarlan a nih danin Pathian biak inkhawma zai leh Krismas leh kumthar lo awm tura ruaiṭheh duh leh duh lo survey neih a ni a, LLTF-ten an vengchhunga kohhran hrang hrangte rawn chungin report siam a ni. Local council 83 aṭangin 53-in report an thehlut a ni.

Report luta duhdan chi hrang hrangte Task Group Member-ten chipchiar takin an sawi hnuah, hrikai positivity rate chu a la him tawk lo anga a lan avangin fimkhur zel ṭha an ti. Pathian biak inkhawmnaah zai chu khap burna siam loin kohhrante hnenah ngenna (appeal) siam an rel.