PWD Vision 2030-ah lei zawng zawng Permanent bridge-a thlak vek tum a ni

Mizoram Public Works Department (PWD) chuan Vision 2030 an siamah Mizorama lei chi hrang hrangte chu kum 2030-ah chuan permanent bridge-a thlak vek an tum. PWD hian Mizoramah lei chi hrang hrang, a nghet lo (temporary)-a dawh 54 leh a ngheta dawh 73, a vaiin 127 an enkawl mek a ni.

PWD engineer-in-chief Vanlaltluanga chuan, kum 2030-ah Mizorama lei zawng zawng a nghet (permanent)-a siam vek turin hma an la mek thu Vanglaini palai zawhna chhangin a sawi a, "A sanction kal lai mek pawh 10 a awm a, leite hi kum 2030-ah chuan permanent bridge-ah siam vek kan tum a ni," a ti.

PWD hotute sawi danin, Mizoram hmun hrang hranga leite chu chi hrang parukah ṭhen a ni a, chungte chu chi thum ve veah ṭhen leh niin, chi thum ve ve hian a nghet chi leh hun rei lo tê atana ruahman chi tia ṭhen hran leh a ni.

Tun dinhmunah permanent bridge (RCC) lei 33, pre stressed concrete (PSC) tia sawi 15 leh built up steel girder bridge (bug bridge) tia sawi 25 a awm a; chu'ngte chu permanent bridge tia sawi niin, a vaiin 73 a awm.

Hun rei tê atana hman chi lei (temporary bridge) chu chi thumah ṭhen a ni a; thir lei (bailey bridge) 47, stiffered steel girder suspension bridge (a chung lam sira inkhai chi) pali leh, thing leh mau hmanga siam (timber bridge) pathum a awm. Heng bakah hian, khaw kar kawnga lei ṭhenkhat, culvert aia zau deuh, lei pangngai anga chhiar rem chiah lo, lei tia sawi ve theih si a awm nual turah PWD hotute chuan an ngai.

A nghet loa lei dawhte zinga pariat chu permanent bridge-a dawh tura hmalak mek a ni a, chung zingah chuan Central Road Fund hnuaia mi pali chu thlak tura thawh mek a ni.

Khadcherra-Damcherra-Zamuang-Kawrtethawveng-Tuilutkawn Road (KDZKT Road)-a Bawrai luia mi te, Aizawl leh Ailawng inkara Tlawng lei leh, Keiṭum leh Arṭahkawn inkar Tuichang lui leite chu chu pre stressed concrete (PSC) hmanga thlak mek a ni a; Bilkhawthlir-Saiphai- Netsura kawng, Serlui chungah pawh PSC hmangin dawh mek a ni.

NABARD hnuaiah Mizorama lei pali chu permanent bridge (bug bridge)-a thlak tura tih a ni a; chungte chu - Peka lui (KDZKT Road), Tuivawl-Saitual- Phullen kawnga mi, KDZKT Road-a Chawngkawl luia mi leh Bairabi-Zamuang road-a Teirei luia mite a ni. Lei pali zinga ṭhenkhat chu han ṭan a nih tawh laiin, a ṭhen chu hna la ṭan loh a nih thu an sawi.

Sorkar kum liam ta, 2017-18 khan NEDP aṭangin Mizorama lei siam ṭhatna tur leh tihchakna turin PWD hnenah cheng nuai 100 pek a ni a, kum kal lai 2018-19 ah pawh nuai 100 tho dah leh a ni. NEDP hnuaia lei siamna atana sum pekte hi state road chhunga mi lei 75 thuam chakna tur a ni.

Tun dinhmunah Mizoramah lei 127 a awm a, national highway-ah 52 leh state highway-ah 75 a awm.