Mipuiin ZPM sorkartir an duh chhan Muanna leh hmasawnna - ZPM GS

June 22, Zirtawpni khan Mamitah ṭangrual pawl, Zoram Peoples Movement (ZPM) Block Steering Committee din a ni a; dinna inkhawmah ZPM secretary general K Sapdanga'n thu sawiin, "Mizoram mipuite'n ZPM sorkartir an duh chhan chu, boruak rálmuang tak hnuaia hmasawnna kawng zawh an duh ve tawh vang a ni," a ti.

K Sapdanga chuan, MNF-in sorkarna an chelh laiin rálthuam keng hel pawlte an tlángnêl avangin mipuiin an rálṭî tih sawiin, "Congress sorkar chhungin ruihhlo a hluar a, ṭhalaite nunna tam takin a tuar tawh. A thlawna dawn kalphungin retheihna a tihzual zel a ni," a ti a; Mizo mipuite'n sorkar kalphung thar, mipui sorkar ding ve tawh se an duh a, tun din ngei pawh an tum niin a sawi.

ZPM Secretary Gene­ral chuan, Mizoram­in state a nih rualpui tlangram state, tlangrama awm ve thote'n kawlphetha megawatt 500-1000 te an neih tawh laia Mizoramin ama puala megawatt 8 chauh a la thar chu a lung­chhiatthlak thu sawiin, “ZPM a sorkar phawt chuan kum 5 chhungin power megawatt 100 thar ngei kan tum,” a ti.

ZPM-in lungrual taka chief minister candidate a nei chu party dangte hrilhlâwkna thu dik loa chantirtu a nih thu sawiin K Sapdanga chuan, "Party dangte'n mak an ti hle a ni. Pawl pasarih ṭangrual hi symbol pakhat hmanga inthlan hmachhawn turin a inbuatsaih mek a ni," a ti a; mipui beisei ang kalphung thar mipui sorkar siam ngei an tum thu a sawi bawk.