MNF ṭhalaite'n community toilet an enfiah

MNF ṭhalaite chuan June 23, Inrinni khan SIPMIU, Aizawl-in Aizawla hmun 10-a vantlang inthiarna (community toilet an sak zinga Zemabawk Bazara mi chu an enfiah.

MNYF-te chuan, SIPMIU-in vantlang inthiarna an siamte chu to uchuak hlea an ngaih thu leh sum siamna atan an hmang nia an ngaih thu tarlangin, SIPMIU enkawltu minister Zodintluanga chu minister ni zel tlak loa an ngaih thu an sawi.

MNYF-te tarlan danin, SIPMIU hian Aizawl khawpuia hmun 10 - Bawngkawn, Ṭhuampui, Bethlehem Vengthlang, Mission Veng, Ngaizel, New Market, Millennium Centre bul, Zarkawt, College Veng leh Zemabawk Bazar-ahte an sa a; man to uchuak taka sak nia an hriat avangin an enfiah a ni.

MNYF vice president Lalremruata Chhangte chuan, êk-in pakhat sak nana Rs. 5,50,000 ruahman a nih laiin, cheng nuai 17.88 zel hman anga sak a ni chu hriatthiam har an tih thu a sawi a, "Sum hman dan a dik lo hleah kan ngai. Ek-in ṭhenkhat phei chu hman hleih theih lohin a awm nual a, tun hnaia SIPMIU-in èk-in sak chungchang a sawifiahna kha a fiah lo telh telhah kan ngai," a ti.

Lalremruata Chhangte chuan, SIPMIU-in vantlang èk-in an a sakte chu September 2017-ah Assembly Estimate Committee-in an eifiah tih sawiin, "A sakna senso a to uchuak hleah an ngaih thu Assembly House-ah an report tawh a, 'Thil tê tak tê tê sak nana hleihluak taka sum sênna' tiin an report a ni," a ti a; chuti chunga mipui hmaa dik lo taka SIPMIU an insawifiah chu mipui zahlohnaa an ngaih thu a sawi.

MNYF Vice President chuan, Zemabawka êk-in chu ft. 10 vel lek biala sak a nih thu sawiin, "A ban phun a, a beam leh slab pahnih vel siam tur hian Mizorama hmanraw ṭha ber ber pawh hmang se eng contractor pawhin cheng nuai 10 aia tam an sên kan ring lo," a ti a; a satu Gangwal Engineering & Construction Pvt. Ltd., Silchar-te sum siampuiah minister a puh a ni.

Zemabawk Bazar building sira community toilet hi chhawng hnih a ni a, ban pali zinga pahnih chuan bazar building ban a ring nghal. A chung leh a hnuaiah zunna bik pahnih (hman man Rs. 5), êkna pahnih (hman man Rs. 10), wash basin pahnih a awm ve ve a; a chunga mi chu hman mek a nih laiin, a hnuai zawka mi erawh chu hman theih a ni lo. Zemabawk Bazar-a ṭhute chuan, a chhawng hnuai zawka inthiarnate chu hawn a nih aṭangin hman theih a la ni lo niin an sawi.