Aizawlah 'Walk in the Dark Rally' buatsaih

India Vision Institute (IVI)-in mit lama harsatna nei leh a thlawna inentirna, a bikin mi harsa zawkte tana an buatsaih ṭhin pualin June 23, Inrinni zing khan Aizawlah mitdelna laka inven leh inenkawl hma inzirtirna atan 'Walk in the Dark Rally' an buatsaih.

Walk in the Dark Rally hi Vanapa Hall kawtah ṭan niin, Millennium Centre kawt thleng ke-in an kal a, Millennium Centre kawtah a khârna hun an hmang. Rally-ah hian Mary Mount School, Comprehensive Model School, St. Mary's School, St. Lawrence School, Oikos Higher Secondary School, Boy's Middle School leh Special Blind School aṭangin sikul naupang an tel a; Persons with Disabilities (PwD) commissioner Dr Lalnunthara'n a vailiam. Footballer Jeje Lalpek­hlua leh Zohmingliana Ralte ten an hmanpui bawk.

Dr Lalnunthara chuan, Mizo­rama mit lama harsatna neite dinhmun sawiin, Mizoramah tun dinhmunah naupang mit lama harsatna neite chu 18% vel an nih thu a sawi.

IVI chief executive officer Vinod Daniel chuan, "Our eye See & I Learn' programme neih mekah Mizorama sikul naupang, mit entirte hnenah tarmit 1800 sem an tum thu a sawi a; an thawhpui Think About Your Eyes leh Essilor Vision Foundation-te nen mit hriselna chungchangah hma an lakho thu sawiin, "Mit entirna lama kan ṭhanharh theih nan awareness kan neih reng a pawimawh," a ti.

Rally-ah hian kumin June thla tira Comprehensive Model School, Model Venga Vision Screening Programme neiha tarmit chawh naupang 18 hnenah tarmit hlan a ni a; Serchhip leh Lunglei district-a sikul naupang 10,000 tana a thlawna mit entirna project hawn a ni bawk.