Rualbanlote hamṭhatna chungchang zirho

Rashtriya Madhyamik Shiksha Abhiyan (RMSA), Aizawl district chuan June 22, 2018 khan Synod Con­ference Centre-ah rual­banlote hamṭhatna pek theih hrang hrang chungchang inhrilhhriatna leh inràwnkhawmna, Sen­sitization & Consultation Programme on IEDSS (Inclusive Education for Disabled at Secondary Stage) for Advocacy and Stake Holders Participation an buatsaih.

Inràwnkhawmnaah hian IEDSS scheme, rualbanlote tana special scho­larship chungchang, sikul, community hall, biak-in, sorkar building, van­tlang inthiarna leh ATM booth-a rualbanlote puala ruahmanna awm ṭha tâwk lo chungchang te, rualbanlo zirlaite an nu leh pate leh zirna-in lamin harsatna an tawh hrang hrangte sawiho a ni.

Workshop hi Persons with Disabilities (PwD) commissioner Dr Lalnun­thara'n a kaihruai a, resource person hrang hrangin thu an sawi. UDPA department, Higher & Technical Edu­cation department, Social Welfare department, Presbyterian Church of India, Baptist Church of Mizoram, Salvation Army, United Pentecostal Church, Roman Catholic, Central YMA, MHIP, rualbanlo nu leh pa te, Samaritan Association for the Blind, Differently Abled Society, Spastic Society of Mizoram, Mizoram Blind Society of Mizoram, Hearing Impaired Parents Society of Mizoram leh NSS aṭangin mi ṭhahnem tak an tel a ni.

Mizoram sorkar chhin­chhiah danin, Mizo­ramah elementary stage aṭanga higher secondary school thlengin rualbanlo zirlai 4,579 an awm a, chu'ng zinga 3,158 chu elementary stage-a mi niin, mi 1,421 chu high school leh higher secondary school-a zirlai an ni. RMSA, Inclusive Education hnuaiah Mizo­ram pumah special educator 45 an awm bawk.