Seṭhawna ruihhlo ngaite enkawlna Cheng vbc. 7.73-in tichangtlung dawn

Social Welfare minister Dr K Beichhua chuan nimin khan New Delhi-ah Union minister for Social Justice & Empowerment Thawaarchand Gehlot a hmu a; Union Minister chuan, Seṭhawna ruihhlo ngaite enkawlna hmun Jordan Centre tihchangtlunna atan cheng vbc. 7.73 an pek tur thu a lo hrilh.

Thawaarchand Gehlot chuan, drug demand reduction (ruihhlo mamawh tihtlem) atana Mizoramin ruahmanna a siamte chu pawm vek a nih thu sawiin, "Drug demand reduction atan hian fund 25% Mizoram tan pek nghal a ni ang," a ti.Social Welfare Minister-in Mamit, Lawngtlai leh Siaha-ah ruihhlo ngaite enkawlna turin Integrated Rehabilitation Centre for Addicts (IRCA) din a pawimawh thu leh Central Jail leh district jail zawng zawnga ruihhlo ngaite enkawlna tur, Rehabilitation cum Treatment Centre siam vek a duh thu a sawi bawk a; Union Minister chuan a ṭul ang zela puih a inhuam thu a sawi.

Sericulture leh AH&Vety changtu ni bawk Dr K Beichhua chuan January 8, Nilaini khan Union Textile minister Smriti Irani leh Fisheries, Animal Husbandry & Dairying minister Giriraj Singh te a hmu bawk a; hmalakna tur hrang hrangte a sawipui a ni.